МЧС Саха сиринээҕи салаата Саха сирин олохтоохторун: “Мобильнай төлөпүөҥҥүтүгэр “МЧС России” сыһарыыны туруоруҥ”, – диэн ыҥырар. Ити сыһыарыыга ыксаллаах быһыыга-майгыга киһи хайдах дьаһаныахтааҕын туһунан иһитиннэрии барыта баар диир.
Сыһыарыы хас даҕаны туһалаах салаалаах. Холобур, “Что делать?” салааҕа ыксаллаах быһыыга-майгыга түбэстэххэ хайдах быһыылаахтык дьаһаныахтаахпыт туһунан кэпсииллэр (куолас саҥарар). “МЧС рекомендует” диэн салааҕа ЫБМ хайдах үөскүүрүн, ону хайдах сэрэтиэххэ сөбүн туһунан билии суруллар. “Первая помощь” салааҕа эмсэҕэлээбит киһиэхэ быраастар кэлиэхтэригэр диэри хайдах көмөлөһүөххэ сөбүн туһунан иһитиннэрии киирэр. “Карта рисков” диэҥҥэ күн аайы айылҕаҕа үөскүөн сөптөөх кутталлар туһунан суһал иһитиннэриилэр тахсаллар. Итини таһынан, киһи бэлэмин уонна билиитин тургутар салаалар эмиэ бааллар.
Сыаһырыы көмөтүнэн дьон “112” нүөмэргэ быһа эрийиэн эбэтэр СМС-иһитиннэриини ыытыан сөп. Ону сэргэ, киһи ханна сылдьарын быһаарар уонна ол координаттарын быыһыыр сулууспаларга тута ыытар кыах баар.
“МЧС России” сыһыарыыны “AppStore”, “Google Play”, “RuStore” диэннэртэн хачайдыахха сөп.
Бэй.кэр.
Хаартыска: МЧС Саха сиринээҕи салаатын пресс-сулууспата.
