Киин куоракка VII «Аҕа күрэҕэ» кулун тутар 9 күнүгэр буолуоҕа. Тэрээһини Дьокуускай куорат уокуруктааҕы дьаһалтатын Уопсастыбаннай сибээскэ уонна ыччат бэлиитикэтигэр, Култуураҕа уонна духуобунай сайдыыга управлениелара «Дьокуускай куорат аҕаларын сүбэтин» кытта сыл ахсын ыыталлар.
Күрэххэ киин куоракка уонна аттынааҕы бөһүөлэктэргэ олорор аҕалар уонна уолаттар кытталлар. Күрэх хас да түһүмэхтээх. Хамаандалар бэйэни билиһиннэриигэ, бэрэбинэни хатырыктааһыҥҥа, эрбэтиигэ уонна хайытыыга сорудахтары толоруохтара, мас кыстыырга, ойбон алларыыга, остуолбаҕа ыттыыга, уот оттон чэй оргутууга, хайыһардаах сүүрүүгэ күрэхтэһиэхтэрэ.
Кыайыылаахтары кытта миэстэлэспиттэр дьупулуом уонна сыаналаах бириис тутуохтара. Мантан икки кыайбыт хамаанда муус устар 6-7 күннэригэр Мэҥэ-Хаҥалас улууһун Майа сэлиэнньэтин “Ураһалаах” этнографическай комплексыгар ыытыллар өрөспүүбүлүкэтээҕи күрэххэ кытта барыаҕа.
Сонун төрдө: Дьокуускай куорат уокуруктааҕы дьаһалтата
