Бүтүн Арассыыйатааҕы «Зарница 2.0» байыаннай-патриотическай оонньуу муниципальнай түһүмэҕэр Дьокуускай куорат уонна куорат таһынааҕы тоҕус оскуолаттан 11-13 саастаах кыргыттартан уонна уолаттартан тураруоннуу киһилээх 9 хамаанда кытынна.
Оҕолор биэс ыстаансыйаны, эстафетаҕа, аптамаат хомуйуутугар уонна да элбэххэ күрэстэһэн, туораатылар. Бары көрүҥнэргэ тахсыбыт түмүктэринэн Хатас орто оскуолатын юнармеецтара кыайдылар. Иккис миэстэни Дьокуускай 30 №-дээх оскуолата, үсүһү – Дьокуускай 3 №-дээх оскуолата ылла.
«Зарница 2.0» оонньуу соруга – оскуола оҕолоругар дойдуга тапталы иитии, суһал көмөнү оҥоруу, бэйэ-бэйэҕэ көмөлөһүү үөрүйэҕин сайыннарыы, айылҕаҕа тыыннаах ордорго, дроннары ыытыыттан саҕалаан информационнай атакаҕа тиийэ билиини уонна сатабылы үөскэтии буолар.
«Зарницаҕа» ордук байыаннай-спортивнай эстафетаны уонна байыаннай бэлэмнэниини сөбүлүүбүн. Аармыйаҕа сулууспалаан баран байыаннай идэтин талыахпын баҕарабын. Баҕар, ИДьМ диэки барыам. Бу оонньуу дойдуга бэриниилээх буоларга үөрэтэр», – диэн Дьокуускай 3 №-дээх оскуолатын үөрэнээччитэ Александр Головатских эттэ.
Эмиэ бу оскуола үөрэнээччитэ Люда Семенова «Зарница» оонньуу кыргыттарга эмиэ туһалааҕын бэлиэтээтэ. «Манна кыттан бэйэҕэ эрэллээх, кыбыстыбат буолаҕын, кыаххын арыйан бэйэҕинэн киэн туттаҕыҥ», – диэтэ кини.
Бүтүн Арассыыйатааҕы «Зарница 2.0» оонньууну Дьокуускайга Бэрэсидьиэн Владимир Путин көҕүлээһининэн тэриллибит «Движение Первых» оҕо тэрилтэтин олохтоох салаата, Оҕо (эрдэҕэс саастаах) киин уонна «Юнармия» дьиэтэ тэрийдилэр. Кинилэргэ Арассыыйатааҕы ДОСААФ, СӨ Байыаннай дьайыыларга кыттыылаах бэтэрээннэрин сүбэтэ уонна Арассыыйатааҕы Кыһыл Кириэс регионнааҕы салаата кыттыстылар.
