Арассыыйа силиэстийэлиир кэмитиэтин Саха сиринээҕи управлениетын Намнааҕы оройуоннар икки ардыларынааҕы силиэстийэлиир салаата Кэбээйи улууһугар уһуйаан тутуллуутугар боломуочуйаны кэһэн ыар содулларга тиэрдии чахчытынан холуобунай дьыала тэрийдэ.
Силиэстийэ түмүгэ этэринэн, бу сыл олунньу 19 күнүгэр Мастаах сэлиэнньэтигэр 2017 сыллаахха тутуллубут уһуйаан тутаах эркинэ улаханнык хайа барбыт. Муниципальнай тэриллии дьаһалтатын дуоһунастаах үлэһиттэрэ эбийиэги үчүгэйдик бэрэбиэркэлээбэккэ үлэҕэ киллэрбиттэрэ биллибит.
Дьиэ сууллар кутталлаах буолан, уһуйаан биллибэт болдьоххо сабыллан турар. Силиэдэбэтэллэр буруйу дакаастыыр матырыйаалы хомуйа сылдьаллар. Холуобунай дьыала Кэбээйи улууһун борокуратуурата ыыппыт бэрэбиэркэтин матырыйаалынан тэрилиннэ.
Сонун төрдө: СӨ Силиэстийэлиир кэмитиэтэ
