Киин куоракка Ленин проспегын 25 нүөмэрдээх «Илин Эҥэр» маҕаһыынын аттыгар «Горпечать» тэрилтэ хаһыат, сурунаал атыылыыр аныгылыы моһуоннаах киоската үөрүүлээх быһыыга-майгыга аһылынна. Тэрээһиҥҥэ киин куорат олохтоохторо, ааҕааччылар көхтөөхтүк кытыннылар.
Сахалыы сиэринэн, алгысчыт Дмитрий Артемьев Аал уоту уматан бар дьон ааҕыыга тардыһыыта күүһүрэ, билиитэ-көрүүтэ хаҥыы турарыгар, саҥа киоска үтүөнү үксэтэр, үйэлээҕи тарҕатар сир буоларыгар Үрдүкү Айыылартан көрдөстө. Мустубут дьон кини баҕа санаатын хатылаан чиҥэтэн биэрдилэр. Үөрүүлээх түгэнинэн Дьокуускай куорат олохтоохторун СӨ Урбааҥҥа, эргиэҥҥэ уонна туризмҥа миниистирэ Тимур Ханды, СӨ инновацияҕа, сыыппараны сайыннарыыга уонна инфокоммуникационнай технологияларга миниистирин солбуйааччы Александр Федотов эҕэрдэлээтилэр.
«Уопсастыбаҕа улахан суолталаах бэчээт таһаарыыларын тарҕатар саҥа киоск аһыллыбытынан эҕэрдэлиибин. Төһө даҕаны үрдүк технология үйэтигэр олордорбут, кырдьыктаах уонна таһымнаах суруйуулары кумааҕы хаһыаттартан ылабыт. Онон, бу эйгэҕэ үлэлиир салайааччыларга уонна ааҕар дьоҥҥо махтанабын», - диэтэ миниистир Тимур Ханды.
«Ситим» медиа-бөлөх генеральнай дириэктэрэ Андрей Шилов бэлиэтээбитинэн, бэчээт таһаарыыларын атыылыыр киоскалар хайа баҕарар куоракка бааллар уонна тута кэлии киһи хараҕар быраҕыллаллар.
«Дьокуускай курдук тымныы кыһыннаах дойдуга маннык киоск бары өттүнэн табыгастаах буолуохтаах. Биллэн турар, киоск национальнай бэчээти тарҕатар суолтата мэлдьи өрө тутуллуохтаах. Онон, дириэктэр Саргылана Жиркова кэлэктиибигэр уонна өрөспүүбүлүкэ салалтатыгар махталбын биллэрэбин», - диэн кини тоһоҕолоото.
Салгыы ыҥырыылаах дьон «Горпечать» тэрилтэ дириэктэрэ Саргылаана Жиркованы кытта кыһыл лиэнтэни быстылар. Ол кэннэ киоскаҕа күннэтэ сылдьар аҕам саастаахтар тус санааларын үллэһиннилэр.
Дьокуускай ытык-мааны олохтооҕо, көхтөөх уопсастыбанньык, «Нам» түмсүү салайааччыта Гаврил Местников «Горпечать» тэрилтэҕэ махтала улахан. Кини сүүрбэччэ сылы быһа «Туймаада» маҕаһыын иннигэр турар киоскаттан сөбүлүүр таһаарыыларын көтүппэккэ ылар. Аны бу саҥа киоскаҕа сылдьарыттан үөрэрин, манна хайыы-үйэ элбэх дьон тоҕуоруһарын кэпсээтэ.
«Дьокуускай килбэйэр киинигэр периодиканы, кинигэни тарҕатар саҥа киоска аһыллыбыта сүрдээх кэрэхсэбиллээх. Манна Ольга Андреевна диэн үтүөкэн киһи үлэлиир. Кэлбит дьону барыларын кытта үөрэ-көтө кэпсэтэр, аламаҕай майгылаах, дьону тардар. Тус бэйэм биир сырыыга 400-500 солкуобайга атыылаһан тахсабын. Сөбүлүүр таһаарыыларым элбэхтэр. «Кыымтан», «Саха сириттэн» саҕалаан, «Литературная Россия», «Собеседник» диэннэргэ тиийэ», - диэн кини үөрдэ-көттө. Манна даҕатан, кини салайарын бэлиэтиибит.
Мария Габышева саҥа киоска аттыгар олорор. «Горпечать» киоскатын бэриниилээх доҕоро. Периодиканы сороҕун сурутан, сороҕун атыылаһан ааҕар. Кини Саха сиригэр уонна Дьокуускай куоракка үтүөнү баҕарар киһи быһыытынан, киоск салгыы сайдыытыгар сүбэ биэрдэ.
«Бастатан туран, эҕэрдэлиибин. Ол эрээри, мин санаабар, саҥа киоск аныгылыы үлэлиэхтээх. Баһылык Евгений Григорьев киин-куорат маастар-былаанын көрдөрөрүгэр этэн турардаах: «Ыччат сонуну барытын интэриниэттэн ылар» диэн. Ол кырдьык. Оччотугар бу киоскаларга ол маастар-былаан тоҕо суоҕуй? Манна экран ыйаан, ону аныгы ньыманан ыччакка көрдөрөр тоҕо сатамматый? Иккиһинэн, манна Дьокуускай куораты көрдөрөр биир даҕаны бэчээттэммит да, электроннай да ыйынньык (путеводитель) суох. Дьиҥэр, бу киоск Дьокуускай куорат имиджин оҥорууга төһүү күүс буолуон сөп этэ! Кэскилэ, кыаҕа улахан буоллаҕа! Ону өйдөөн сөпкө туһаныахха эрэ наада», - диэн Мария Николаевна олус туһалаах этиилэри киллэрдэ.
Аҕам саастаах далбар хотун таарыччы тутууга биир итэҕэс баарын туоратарга көрдөстө. Ол эбэтэр, киоск аана уонна кирилиэһэ киирэргэ, тахсарга табыгаһа суох эбит. Аан аһылыннаҕына синньигэс кирилиэскэ турар киһиэхэ охтор куттал үөскүүр, биир даҕаны тутуһар сир суох.
Кырдьыга да, этиллибитин курдук, саҥа киоск тас көстүүтүнэн уонна үлэтинэн Дьокуускай куорат имиджин тупсарар кыаҕа улахан. Билигин манна периодиканы, канцелярияны таһынан «Айар» национальнай кинигэ кыһатын бородууксуйата эмиэ атыыланар. Өссө манна аныгы сыыппара, технология ньыматын киллэрэн, ыччаты уонна туристары тартахтарына, тэрилтэ улахан сайдыы суолун тобулара саарбахтаммат.
Хаартыска: Валерий Стефанский
Бэйэ кэр.
