Эми-тому туттарааччылар (поставщиктар) сыаналарын ыаратан эрэллэр. Cыана 2%-25%, оттон сорох эмкэ 40% диэри үрдээтэ.
«Ассоциации независимых аптек» дириэктэрэ, Альянс диэн фармацевтическэй ассоциациялар хотуннара Виктория Преснякова ТАСС иһитиннэрбитинэн, харчы куурустара уларыйыыларыттан сылтаан, эмп-том сыаната үрдээн эрэр. Тоҕо диэтэр, эми оҥорорго субстанциялара уонна да атын састааптара тас дойдулартан кэлэллэр эбит. Ол эрээри, кини эрэннэрэринэн, дойдубут аптыакаларыгар эмп саппаастара бааллар эбит.
«Биһиги арааһынай позицияҕа дэписиит буолбатын туһугар үлэлэһэбит. Уопсайынан, балаһыанньа бигэ туруктаах. Эмп-томп саппаастара аптыакаларга уонна эми туттарааччыларга бааллар. Препараттары аҕалыыга тохтобул буолуо суохтаах», - диэн Преснякова эрэннэрдэ.
Солкуобай «түһэн», ордук чуолаан тас дойдулартан кэлэр эмп-том сыаната биллэ ыараата. Препараттары туттарааччылар сыаналарын 2%-25%, оттон сорох эмкэ 40% диэри үрдэттилэр. Маны таһынан, Арассыыйа утары санкциялары биллэрбиттэрин кэннэ, дистрибьютордар сервер уонна табаары аҕалыы үлэлэригэр кыһалҕалары көрсөн саҕалаабыттарын туһунан биллэрдилэр. Онон, тардыллыы баар. Преснякова Арассыыйа бары эрэгийиэннэригэр балаһыанньа оннугар түһүө диэн этэр.
Бу күннэргэ олоххо тыын суолталаах эмтэр сыаналара үрдээбэт – бу манна 800 препарат ыйылла сылдьар. Сокуон быһыытынан, маннык эмтэргэ сыана сылга биирдэ эрэ, официальнай инфляция дьайыытыттан эрэ үрдүөхтээх.
