Икки норуот култууратын илдьэ сылдьар уонна ураты, кэрэ айылҕалаах Хаҥалас улууһа «Культура» тэлэбиидэнньэ ханаалын үлэһиттэрин болҕомтолоругар киирбит. Улуус пресс-сулууспатыгар чопчулаан эппиттэринэн, бу бырайыак Саха АССР төрүттэммитэ 100 сылын чэрчитинэн олоххо киирэн эрэр эбит. Бэҕэһээ бөлөх Бокуруоскай куоракка олорор Бабатунде дьиэ кэргэни устубут, оттон бүгүн аатырбыт Өлүөнэ очуостарыгар уонна бизонарийга тиийиэхтээх.
Бокуруоскай куоракка нигериец Марк Бабатунде саха кыыһын Наталья Иванованы кэргэн ылан олорор. Эдэр дьон Дацин диэн Кытай куоратыгар 2004 сыллаахха устудьуоннуу сылдьан билсибиттэр. Иккиэн кытай омук тылын үөрэппиттэр. Аны уон сылынан кэргэнниилэр оҕолорун илдьэ Наталья дойдутугар көһөн кэлбиттэр. Марк буоллаҕына оскуолаҕа аангылыйа уонна кытай омук тылларын учууталынан ананан үлэлии киирбит. Оттон киниэхэ бэйэтигэр нуучча тыла номнуо төрөөбүт тылын курдук чугас буолбут эбит.
Тэлэбиидэнньэҕэ бу устубут биэриилэрэ хаһан тахсара чопчулана сылдьар.
