Саха сиригэр тыа баһаардара 86 ахсааҥҥа тиийэ аҕыйаатылар. Ааспыт суукка иһигэр өрөспүүбүлүкэ 9 оройуонугар, 9213 га иэннээх сиргэ 20 ойуур баһаарын умуллардылар. Бу туһунан СӨ Экологияҕа, айылҕаны туһаныыга уонна тыатын хаһаайыстыбатын миниистирин солбуйааччы Андрей Коноплев иһитиннэрдэ.
«Алдан оройуонугар 4 тыа баһаара умулунна, тоҕус Нерюнгри оройуонугар, биирдии тыа баһаара Мэҥэ-Хаҥаласка, Мииринэйгэ, Өймөкөөҥҥө, Өлөөҥҥө, Томпоҕо, Уус Алдаҥҥа уонна Уус Майдаҕа тохтотулунна», - диэн миниистир солбуйааччыта иһитиннэрдэ.
Маны сэргэ, Андрей Коплев 37 га иэннээх тыа баһаарын Өлөөн улууһугар умулларбыттарын туһунан эттэ. Ол эрээри, өссө биир тыа баһаара 5 га иэннээх сиргэ Уус Алдан оройуонугар тахсыбыт. Оттон 7146 га иэннээх сиргэ 6 тыа баһаара Үөһээ Дьааҥыга, Бүлүүгэ, Мииринэйгэ, Уус Алдаҥҥа, Уус Майдаҕа уонна 1537 га иэннээх ойуур баһаара Өймөкөөн улууһугар салгыы тарҕамматын курдук тохтотулуннулар.
«Бүгүҥҥү күн саҕаланыытын туругунан, өрөспүүбүлүкэҕэ 226 261 иэннээх сиргэ 86 ойуур баһаара баар. Былырыын баччаларга 2 мөл. гектардаах 173 тыа баһаара баара биллэр этэ», - диэн Коноплев салгыы иһитиннэрэр. Кини этэринэн, 40 тыһ. га сиргэ тахсыбыт 17 ойуур баһаарын умулларыыга күүстээх үлэ бара турар. Мантан 4-дэ уустук суоллаах-иистээх, ыраах сиргэ сытар. Умулларыыга барыта холбоон 1146 киһи уонна 110 тиэхиникэ көрүллүбүт.
Бүгүҥҥү туругунан былыттардаах буолан, Авиалесохрана Ан-26 зондировщига уонна Росгидромет Як-42Д сөмөлүөттэрэ күүскэ умайа турар тыалар үрдүлэригэр «сымыйа» ардахтары ыҥырыыга үлэлииллэр.
«Бүгүн сарсыардааҥҥы туругунан, Алдан, Үөһээ Бүлүү, Ньурба, Сунтаар, Таатта, Уус Майда, Хаҥалас оройуоннарыгар 4 кылаастаах баһаарынай куттал үөдүйэн турар. Эрэнэр буоллахха, халлаан туруга уларыйдаҕына, бу истиэпэннэрэ кыччыахтара», - диэн Андрей Коноплев бэлиэтиир.
Санатар буоллахха, Саха сиригэр Ыксаллаах быһыы-майгы режимэ олохтонон турар, оттон Хабаровскай кыраайга уонна өрөспүүбүлүкэ соҕуруулуу-илин өттүгэр баһаардар тахсыбыт буоланнар, федеральнай хабааннаах Ыксаллаах быһыы-майгы режимэ эмиэ биллэриллибитэ.
