Бэс ыйын 8 күнүн сарсыарда 8 ч. туругунан, Саха өрөспүүбүлүкэтигэр 4 тыа баһаара тахсыбыта биллэр: Уус Майаҕа, Өлүөхүмэҕэ, Үөһээ Дьааҥыга уонна Өймөкөөҥҥө. Саха сирин Экологияҕа министиэристибэтэ иһитиннэрэринэн, билигин Өлүөхүмэҕэ тахсыбыт улахан тыа баһаарын салгыы тарҕаммат гыммыттар, бүгүҥҥү туругунан, уоту тохтотуу үлэтин ыыталлар. Уопсайа уот сиэбит иэнэ 835 га буолбут. Бу тахсыбыт тыа баһаардарын умулларыыга Авиалесохрана 142 парашютист-десантнига, тыа охранатын 26 үлэһитэ, Ыксаллаах быһыы-майгы министиэристибэтин биир үлэһитэ уонна нэһилиэнньэттэн 3 киһи үлэлии сылдьаллар. Маны сэргэ, 7 тиэхиникэ баар эбит.
Ааспыт суукка иһигэр, Аммаҕа уонна Ленскэй оройуоннарыгар тахсыбыт тыа баһаардарын тохтоттулар. Бэлиэтээн эттэххэ, ыам ыйын 30 күнүгэр, Ленскэй оройуонугар суола-ииһэ мөлтөх уонна түгэх сиргэ баһаар тахсыбыта. Ол эрээри, тыа баһаардарын умулларааччылар кэмигэр тиийэн, күөх төлөн салгыы тарҕаныытын тохтоппуттара.
Өрөспүүбүлүкэҕэ тахсыбыт умайыылары тутатына көрө охсон, миэрэлэри ылар соруктаах күн ахсын халлаанынан уонна сиринэн сылдьан кэтииллэр-маныыллар.
