Сайыҥҥы уһун сынньалаҥ кэмигэр оҕолор көрүүтэ-истиитэ суох хаалыылара, өргө диэри таһырдьа сылдьыылара, онно-манна тиийиилэрэ элбиир. Бу кэмҥэ оҕо аймахха ордук болҕомтолоох буоларбыт, элбэхтик сэрэтэ, үчүгэйдик хонтуруоллуу сылдьарбыт ирдэнэр. Бу төрөппүккэ эрэ сыһыаннаах буолбатах, хайа баҕарар улахан киһиэхэ туһуланар.
Хомойуох иһин, Сахабыт сиригэр оҕолор суорума суолланыылара тахса турар. Бэс ыйын 11 күнүгэр Ленскэй оройуонугар сылгы туйаҕыттан 3 cаастаах уолчаан күн сириттэн күрэммитэ. Кини бэйдиэ сылдьар сылгы үөрүгэр чугаһаабыт “буруйдаах”. Ый бүтүүтэ 12 cаастаах оҕо Бүлүү эбэ уутугар былдьаммыта. Ааспыт нэдиэлэҕэ 5 саастаах уолчаан 12-c этээстэн үлтү түһэн саҥа саҕаланан эрэр олоҕо быстыбыта.
Оттон бүгүн Дьокуускайга «НЕФАЗ 66064-62» уу кутар массыына 13 саастаах оҕону үрдүнэн тэпсэн ааспытын туһунан хомолтолоох сонун тарҕанна. Бу алдьархайга суоппар буруйдааҕа саарбахтаммат. Кини күөх уокка велосипедынан суолу туораан иһэр оҕону өйдөөн да көрбөтөх. Оҕо барахсан төбөтүгэр туох даҕаны харыстанар тэрилэ суох буолан, ыараханнык эчэйэн, онно быстаахтаабыт.
Манан тугу этээри гынабытый... Оҕо олоҕор куттал суоһаабатын туһугар, төрөппүт эрэ буолбакка, бары кыһаллыахтаахпыт. Болҕомтолоох, сэрэхтээх уонна эппиэтинэстээх буолуу, бастатан туран, улахан дьонтон эрэйиллэр. Доруобай уопсастыбаҕа, сайдыылаах дойдуга оҕо быстахха былдьанан өлүүтэ тахсыа суохтаах. Ол эбэтэр, дьон өйө-санаата уларыйыахтаах, ону кытары олох таһыма үрдүөхтээх.
Бэйэ кэрр.
