Тутулла турар воркаут-былаһааккалар бары доруобуйаларынан хааччахтаах нэһилиэнньэҕэ аналлаах тэриллэрдээх буолуохтара. Маны таһынан Култуура уонна сынньалаҥ пааркатыгар успуорт-оҕо инклюзивнай былаһаакката оҥоһуллуоҕа.
Хаҥалас (Кангаласцы), Марха сэлиэнньэлэригэр воркаут-былаһааккалар үлэҕэ киирдилэр. Куорат күнүн көрсө Пригороднайга, Владимировкаҕа, Дьокуускайга Сэргэлээх суолугар уонна Можайскай уулуссаҕа (“Стерх” СК) аһыллыахтара.
Балаҕан ыйын устата Дзержинскэй (Губинскай уокурук), Петровскай (Октябрьскай уокурук), Сэбиэскэй Аармыйа 50 сыла (Промышленнай уокурук), Яков Потапов (Сайсары уокуруга) уонна Пушкин (Киин уокурук) уулуссаларга баар воркаут-былаһааккалар тутуллан бүтүөхтэрэ.
Санатан эттэххэ, куоракка воркаут-былаһааккалар тутуулара баһылык Евгений Григорьев көҕүлээһининэн ыытыллар. “Формирование современной городской среды на территории ГО “город Якутск” муниципальнай бырагыраамаҕа киирэн “Организация и обеспечение благоустройства спортивных (воркаут) площадок” диэн дьоҕус бырагыраама чэрчитинэн үлэ барар.
Баһылык Дьокуускай куорат уонна куорат 15 нэһилиэнньэлээх бары пууннарын араас саастаах олохтоохторо успуордунан дьарыктаналларыгар табыгастаах усулуобуйаны тэрийэр сыалы-соругу туруорбута.
2021 сыллаахха бу бырагырааманан 15 воркаут-былаһаакка тутуллубута. Ол курдук, Дзержинскай (45/1, 45/2), Билибин (17/1), Совхознай (27), Кальвица (11/1), Курнатовскай (3/5), Лермонтов (58), Каландаришвили (23/1), Павлик Морозов (1), 202 түөлбэҕэ, Автодорожнай (40/10), 26-с Партсъезд, Хаҥаласка (3 былаһаакка), Хатаска Дорожная (8/1), Олег Кошевой (96), Мархаҕа Уваровскай, Табаҕа, Тулагы Киллэмҥэ Алымов, Маҕаҥҥа Каландаришвили уулуссаларыгар.
Куорат көхтөөх олохтоохторо бырайыактары толкуйдааһыҥҥа кыттыбыттара, ханнык успуорт тэриллэри атыылаһарга этиилэри киллэрбиттэрэ, ханан табыгастаахтык туруорарга сүбэлээбиттэрэ.
Воркаут успуордунан босхо дьарыктанарга усулуобуйаны тэрийэр, фитнес-кулууптары, эрчиллэр саалалары солбуйар кыахтаах суб-култуура биир хайысхата буолар.
Дьокуускай куорат дьаһалтатын пресс-сулууспатын матырыйаалларынан.
