Илиҥҥи экэниэмикэ пуорумун (ВЭФ) «Территория инноваций» быыстапкатыгар Саха сирин хампаанньалара инновационнай бырайыактарын көрдөрүүгэ илдьибиттэр. Манна барыта «Якутия» технопарк резиденнэрин 7 бырайыага кыттар быраабы ылбыттара.
«МультиДиТек» диэн тэрилтэ интерактивнай 3D-босуобуйалардаах SmartBooks.live бырайыагын билиһиннэрбит. «Сайберия» тэрилтэ рентгенолог-быраастарга аналлаах үстүрүмүөннэри уонна мэдисиинэ түһэриилэрин ырытар модуллары, «СмартЮнит» тэрилтэ ойуур баһаарын сэрэтэр саҥа «Сильван» систиэмэтин көрдөрбүттэр.
Маны таһынан, резиденнэр киинэни адьас аҕыйах нэһилиэнньэлээх пууннарга көрдөрөр Extra Cinema проекторы уонна сыыппара платформатын көрдөрүүгэ туруорбуттар. «Ведроид Электроникс» бырамыысалыннаска туттуллар ыраастыыр уонна дезинфекциялыыр робот-тиэхиньикэни, «Саха сиринээҕи хочуол собуота» маһынан, гааһынан уонна тугунан баҕарар оттуллар хочуолларын илдьибиттэр.
Быыстапка ыалдьыттарыгар өссө массыына кэннигэр соһуллар, айаннаан иһэн сынньанарга аналлаах SakhaCamper диэн прицебы көрдөрбүттэр. Бу прицеп массыынаттан тутулуга суох уонна күн уотунан барар панеллаах эбит.
Хаартыска: Андрей Сорокин (ЯСИА)
