Саха сиригэр 2021 сылтан оҕолор уһуйааҥҥа 2 ыйдарыттан 3 саастарыгар диэри сылдьар буолуохтара, онуоха сөптөөх усулуобуйаны тэрийиэхтэрэ.
Саха сирэ анал федеральнай бырагыраамаҕа кыттар. Ол чэрчитинэн СӨ Бырабыыталыстыбата уонна РФ Үөрэҕин министиэристибэтэ сөбүлэҥ түһэристилэр. “Федеральнай субсидиялаах бырагыраама олоххо киириитин түмүгэр 2018 уонна 2019 сылларга 2 ыйдарыттан 3 саастарыгар диэри оҕолорго уһуйааҥҥа 1029 миэстэ эбии тахсар былааннаах”, -- диэн үөрэх миниистирин бастакы солбуйааччы Феодосия Габышева кэпсээтэ.
Эбии миэстэлэри таһаарар мэхэньиисим араас. Ол курдук, биэс уһуйааны Хаҥаласка, Үөһээ Бүлүүгэ, Намҥа, Тааттаҕа уонна Горнайга тутуохтара. Итини таһынан Дьокуускайга элбэх кыбартыыралаах олорор дьиэ бастакы этээстэригэр дьааһылалардаах уһуйааннары тэрийиилэрин түмүгэр эбии 600 миэстэ баар буолуо.
