Быйыл Мииринэйгэ кыаммат-тиийиммэт төрөппүттэр оҕолоругар аналлаах “Харысхал” оҕону реабилитациялыыр киин тэриллибитэ сүүрбэ сылын туолар. Үбүлүөйгэ сөп түбэһиннэрэн, “Харысхал” сабыс-саҥа дьиэлэнээри олорор.
2016 сылтан ыла Комсомольскай уулуссаҕа «Харысхал» аныгы барыйааннаах таас дьиэтэ тутуллар. Бэрт сэргэх быhыылаах, аныгы дизайннаах, киһи көрөн астынар дьиэтэ буолан эрэр.
Эбийиэги Саха сирин Үүнэр көлүөнэ пуондата үбүлээн туттарар.
Тутуу бэрэстэбиитэлэ – «Строймонтаж2002» тэрилтэ, бэдэрээччит – «Востокстройкомплектация» фирма.Тутуу кулун тутар ыйтан, халлаан сылыйаатын сылаас кытары биллэ тэтимирбитэ.Сайын устата үлэ күөстүү оргуйда. Манна Кыргызстан тутааччыларын биригээдэтэ үлэлиир.
Тутуу ис бараана бүттэ. Аны эбийиэк тулатын бетоннааһын, дьиэ ис тутулун бөҕөргөтөр, инженернай ситимнэри киллэрии-таҥыы үлэлэрэ ыытылла тураллар.
Тутааччылар 2018 сыл ахсынньытыгар бүтэрэр былааннаахтар.
Станислав Алексеев, Мииринэй к. Ааптар хаартыскалара.
