Бэрдьигэстээх—Дьокуускай хайысхатынан сиринэн оптоволокнону тардыы алтынньы ыйтан саҕаланыа. Бу туһунан “Сахателекоммуникации” ХЭУо генеральнай дириэктэрэ Виктор Петров иһитиннэрэр.
“Билиҥҥи туругунан түргэн тэтимнээх Интэриниэт оптоволокно лииньиийэтэ сиринэн буолбакка, быстах схеманан тардыллыбыта. Сиргэ хаабылы ууруу бу алтынньы ыйтан Бэрдьигэстээхтэн саҕаланан, Дьокуускайга диэри тардыллыаҕа. Сир тоҥмутун кэннэ тиэхиньикэ үрдүнэн ааһар кыахтаныаҕа. Тутуу сезона түмүктэниэр диэри, биһиги оптоволокнону Бэрдьигэстээхтэн Маҕараска диэри аҕалыахпыт. Оттон күн-дьыл туран биэрдэҕинэ, киин куоракка диэри тиэрдиэхпит”, — диир Виктор Петров.
Санатар буоллахха, ВОЛС хаабылын Бэрдьигэстээххэ диэри тардыы былырыын кулун тутартан саҕаламмыта. Ити кэмтэн ыла, улуус киинигэр 4G сыыдам мобильнай Интэриниэт холбоммута.
