Киирии

Киирии

Дьокуускайга, Нерюнгрига , Алдаҥҥа , Мииринэйгэ курдук үрдүк хамнастаах үлэ суох.

Ол туһунан суруйдум ини, суруйбатым ини. Оттон Мииринэй курдук суруналыыс бакаансыйатын Дьарыктаах буолуу Киинигэр араас саайтарга сотору-сотору таһаарар куорат Саха сиригэр суоҕун кэриэтэ. Урут хаһан да маннык буолбат этэ.Тус бэйэм маннааҕы оройуон хаһыатыгар үлэлии сылдьыбытым да, кэрэспэндьиэн миэстэтэ куруук былдьаһык этэ диэн этэр кыахтаахпын.Билигин олохтоох иһитиннэрэр-биллэрэр эйгэ үлэтигэр эдэр, талааннаах кэрэспэндьиэннэр (хамнастара - 43.346 – 82.818 солк) ирдэнэллэр.

Мииринэй тыйаатырыгар артыыс идэлээх дьону көрдөөбүттэрэ ыраатта.

50 тыһыынча солк. хамнас төлүүргэ бэлэмнэр. Мантан салгыы Мииринэйгэ туох-ханнык сибиэһэй үлэ миэстэтэ баарын суруйабын.Тугу эмэ сэргэҕи тосхотооччуну көрдүүбүн.Тоҕо диэтэххэ, Мииринэй оройуонун үрдүнэн орто хамнас 103 тыһыынча солкуобайы, «АЛРОСА» үрдүнэн - 123 тыһыынча солкуобайы куоһаран турар.Холобур, манна 60 - 70 тыһыынча солк. хамнас эрчимнээх эр киһиэхэ тук буолбат.

“ТаасҮрэхнефтегаздобычаҕа” электроыстаансыйа начаалынньыга (104 тыһыынча солк), супервайзер (99.000 солк) ирдэнэллэр.

"Якутскэнерго" хампаанньаҕа, ЗЭСкэ диспиэччэр (90.000 солк), Интэриниэт оптоволокно хаабыла холбоммут лиинньийэтин өрөмүөннүүр маастар (74.000 солк) үлэлэрэ бааллар.

"АЛРОСА-Торг” тэрилтэ Мииринэйтэн 287 биэрэстэ тэйиччи сытар Моркуока бөһүөлэгэр баахта ньыматынан үлэлиир хаһаайыстыба сэбиэдиссэйин (80.000 солк) уонна ас астааччыны(63.000 солк) ыҥырар.

Итинэн да холобурдаатахха, Мииринэйгэ син-биир үлэ баар. Ол эрэн, биир суолу умнумаҥ. Манна хамнас, Дьокуускайга холоотоххо, төһө да быдан үрдүгүн иһин, биир “ноолоох”. Ол - олорор дьиэ боппуруоһа дэбигис кыаллыбата буолар.Таас дьиэҕэ икки хостоох кыбартыыра куортама – отут-түөрт уон тыһыынча солк, биир хостоох кыбартыыра – сүүрбэ аҕыс – отут тыһыынча солк. Мас дьиэҕэ да сыана син-биир ыарахан.Саамай мөкү өрүтэ – куортамнаһаргар дьиэ да көстүбэт. Куорат чиэппэрэ – баахта, кэлии, быстах олорооччу дьон. Ону учуоттуургут булгуччулаах.

Станислав Алексеев, Мииринэй куорат.  

Тарҕат:

Комментарии

Защитный код Обновить