Киирии

Киирии

Мииринэйтэн Дьокуускайга диэри айан суола хаһан сөргүтүллэрин күн аайы туоххаһыйа күүтэбит. Бүгүҥҥү туругунан Кириэстээх икки парома Бүлүү өрүскэ киирэ иликтэр, сыныйан өрөмүөннэнэ тураллар. Мииринэйтэн Таас-Үрэҕинэн Усть-Куттуур суол балтараа ый аннараа өттүгэр сабыллыаҕыттан ылата “материктан” ас-үөл кэлбэт.

Алмаастаах кыраай олохтоохторо кыһалҕаттан “Бүөт Бөтүрүөп саҕанааҕы” эргэрбит аһылыгы “эмсэхтэнэ” олоробут. Арҕаа да, илин да массыына сылдьыбат кэмигэр, Мииринэй куорат олохтоохторо сибиэһэй аһылыгы харахтаабаппыт. Дьокуускайга “Сайсары” ырыынагар курдук олохтоох бородууксуйаны: ынах, убаhа, сибиинньэ, таба эттэрин Мииринэйгэ төрүт харахтаабаккын. Кириэстээхтэн “Табаҕа” пиирмэ сүөгэй, чөчөгөй, сиикэй арыы, чохоон, барыанньа саҥа күүтүүлээх баартыйаларын хаһан ыытыа биллибэт. Бу эмиэ суол суоҕуттан сылтаан.

Хомойуох иhин, Сунтаартан кэлэр ынах уонна убаһа этин бүгүн манна отой көрбөккүн. Сунтаардар тыаларын этин 10 тыһ нэһилиэнньэлээх, бэйэтэ куорат тэҥэ буолбут улуустарын киинигэр тиэйэллэр. Биһиэхэ кэлэ да сорумматтар. Мииринэй куорат ырыынагар “Новай” сопхуос кууруссатын уонна Бүлүү соботун атыылаабаттара буоллар, букатын харарҕаан мөлтүө эбиппит. Мииринэй оройуонун маҕаһыыннарыгар Данияттан, Бразилияттан, Аргентинаттан, Австралияттан кэлбит эти көрөбүт. Омук дойдуларын этэ мииҥҥэ, соккуойга ончу барсыбат, хайдах эрэ дьикти хос амтаннаах. Тыа хаһаайыстыбатын министиэристибэтэ уонна “Ситим” медиа-бөлөх тэрийбит улуустар атыытын дьаарбаҥкатын кэнниттэн чуумпуруу бүрүүкээтэ.                                                            

 Билигин эргиэмсиктэр кыhыны быhа сытан улуктуйбут эттэрин батара сатаан, күнү барыылларын көрөбyн.  Онон, арыы, чохоон, ис, буотарак, харта, хаhа Мииринэйгэ күннээххэ көстүбэт күндү аhылыктар. Мииринэйгэ ырыынакпыт адьаһын “дьyдэйдэ”. Онно-манна соя булкадаhыктаах халбаhыылар, сарделькалар, сосискалар, хантан тиэллэн кэлэн, төһө өр сыппыта биллибэт кэтилиэттэр, эриллибит эт. Ити астары өссө төгүл төхтөрүйэн Роспотребнадзорга, Санэпиднадзорга, Ветнадзорга сыныйан чинчиппит киhи баар ини!

Сахалыы ис миинин испэтэх ыраатта. Субай хаанын, ыыс-араҕас кылдьыылаах убаhа этин туустаан-тумалаан маҕырыйбатах быданнаата. Ханна эрэ биэ кыыгынас кымыhын, ымдааны-быырпаҕы, суораты, сиҥэни ыймахтыыллар, сылгы эмис хартатынан эмсэхтэнэллэр, үрүмэлээх дагдалаах малааһынныыллар. Абыраммыт да дьон! Биhиэхэ ол сыта да суох. Сахалыы “чэгиэн ас” хаһан Мииринэйгэ дэлэйэрэ остуоруйа. Дьаарбаҥкаттан дьаарбаҥкаҕа эрэ диэри олороохтуубут. Куһаҕана сүрдээх.

miirneige cyox et

Маннык эт Мииринэйгэ мэлигир

tirexpiirme

Сунтаартан “Тирэх” пиирмэттэн кэлэр барыанньа уонна джем

xotydoidybalyga

Хоту дойду балыга эмиэ суох

Станислав Алексеев, Мииринэй куората.                               

Тарҕат:

Комментарии

Байбал
+6 Байбал 16.05.2019 12:28
Оннук ;-)
Ответить

Защитный код Обновить

Болҕойуҥ ! Чэпчэтиилээх сурутуу саҕаланна!

kyym podpiska