От ыйын 22 күнүгэр Ил Дархан Айсен Николаев Мэҥэ Хаҥалас улууһугар, илин эҥэр улуустарын уонна нэһилиэктэр баһылыктара кыттыылаах сүөһү аһын бэлэмниир хампаанньа үлэтин боппуруостарыгар мунньаҕы ыытта.
Тыа хаһаайыстыбатын министиэристибэтин көрдөрүүтүнэн, быйыл өрөспүүбүлүкэ үрдүнэн 479 тыһ туонна от, 24 тыһ туонна сиилэс уонна 14 тыһ 200 туонна сенаж бэлэмнэниллэрэ былааннанар. Ил Дархан Мэҥэ Хаҥалас уонна Уус Алдан улуустарыгар уустуктар баалларын бэлиэтээтэ. Уонна тустаах министиэристибэлэр ыраах сытар учаастактарга мобильнай биригээдэлэри тэрийэн ыыталларыгар сорудахтаата.
Айсен Сергеевич Мэҥэ Хаҥаласка сырыытыгар фермердэр үлэлэрин көрдө-иһиттэ. Ол курдук, Бөкө нэһилиэгэр “Анабы” диэн сиргэ “Морозов” бааһынай, фермерскэй хаһаайыстыба 65 гектар иэннээх оттуур сиригэр сырытта. Нэһилиэк баһылыга Иван Новгородов, 2017 сыллаахха Роман Морозов саҕалааччы фермер быһыытынан 1,5 мөл солк суумалаах тыа хаһаайыстыбатын министиэристибэтин гранын ылбытын кэпсээтэ. Роман бу үбүнэн от охсор тиэхиньикэ уонна 20 төбө хороҕор муостааҕы атыыласпыт. Билигин кини хаһаайыстыбатыгар 50 төбө ынах уонна 30 тахса сылгы баар.
Салгыы Ил Дархан Хорообут нэһилиэгэр сылдьан сэбиэскэй кэминээҕи ууну кутар систиэмэни көрдө. ТХМ “Упрмелиоводхоз” тэрилтэ илин эҥэрдээҕи филиалын үлэһиттэрэ кэпсииллэринэн, 1993 сыллаахха 361 га сири сиигирдэргэ анаан оҥоһуллубут үһүс шлюз-регуляторына, Суола үрэхтэн ууну ыытарга улахан өрөмүөн ирдэнэр. Айсен Сергеевич үп көрдөөн регуляторы оҥороллоругар сорудахтаата.
Оттон Төҥүлү нэһилиэгэр “Тукулуйа” диэн оттуур сиргэ сырытта. Манна үлэ бэтэрээнин, тыа хаһаайыстыбатын үтүөлээх үлэһитин Николай Бойцовы кытта көрүстэ. Николай Михайлович ааспыт сылтан оттуур сирдэр олохтоох дьаһалта быһаарыытынан биирдиилээн хаһаайыстыбаларга бэриллэр буолбуттарын кэпсээтэ. Бу олохтоох дьоҥҥо сүҥкэн көмө буоларын бэлиэтээтэ. “Быйыл от үүнүүтэ төһө да мөлтөөтөр, олохтоохтор сүөһүлэрин ахсаанын аҕыйатар санаалара суох. Мин уолаттарым эмиэ тыа хаһаайыстыбатынан дьарыктаналлар. Улахан уолум Михаил “Сардаҥа” кэпэрэтиип бэрэссэдээтэлэ, оттон кыра уолум Альберт “Баишев” бааһынай, фермерскэй хаһаайыстыба салайааччыта”, – диэн Николай Михайлович кэпсээтэ.
