Былырыыны, быйылы быһа Накыын бөһүөлэгэр, баахта ньыматынан үлэлээччи горничнайдары, муоста сууйааччылары, быстах үлэлэргэ оробуочайдары (Разнорабочие) ыҥыран ахан биэрдилэр.
Клининг тэрилтэтэ баахта бөһүөлэгин уопсайдарын хомуйааччылар үлэлэрин миэстэлэрин сотору-сотору таhаарар.
Хамнастара маннык: Биир ыйга горничнай, муоста сууйааччы 37 000 солк ылар. Айанын ороскуота төлөнөр. Баахта уопсайдарыгар босхо олордоллор. Арай, Накыыҥҥа оробуочай остолобуойга босхо аһыыр кыаҕа суох. Дьиэтиттэн биир ый аһыыр ыһыктаах бардаҕына эрэ сатанар. Быстах үлэлэргэ сылдьар оробуочай үлэтэ эмиэ дөрүн-дөрүн тахсар. Баахталарын хамнаһын 60 күнүнэн ааҕаллар. Оччотугар биир ыйга 45 000 солк буолан тахсар. Айаннара төлөнөр. Аһылыктара булгуччу бэйэлэрин суотугар. Баахтаттан сынньалаҥ кэмигэр харчы төлөммөт. Маннык үлэлэри ордук соҕуруу дойдуттан кэлбит дьон ыйыталлар эбит. Тоҕо диэтэххэ, Мииринэй куоратыгар уонна чугастыы сытар бөһүөлэктэргэ дьиэ куортама олус ыарахан. Оттон Накыыҥҥа үөһэ ыйбыт үлэлэргэ сөбүлэспит киһи кыра да хамнас ылар, буор-босхо баанналаах, туалеттаах, куораттыы усулуобуйалаах дьиэҕэ олорор.
Станислав Алексеев, Мииринэй к., ааптар хаартыскалара.
