Киирии

Киирии

Хайа баҕарар оройуоҥҥа үрэҕи туоруур муоста тутуллуута экэниэмикэҕэ, олох-дьаһах сайдыытыгар сүрүн оруолу ылар. Бүгүн, балаҕан ыйын 19 күнүгэр, илин үрэҕи туоруур Дэгэрэҥ муостата тутуллан бүтэн үөрүүлээх арыллыыта буолла.

Бу муостаны тутууну Мүрү, I Хоро, Хоро нэһилиэктэрэ уруккаттан туруорсубуттара бүгүн олоххо киириитэ сааһыттан тутулуга суох элбэх олохтооҕу үөртэ. Үөрүүлээх түгэҥҥэ муостаны арыйыы бэлиэтэ – кыһыл лиэнтэни улуус дьаһалтатын баһылыгын I-гы солбуйааччы П.И.Попов, СӨ суолга салалтатын сүрүн дириэктэрин солбуйааччыта А.К.Потапов, сүрүннүүр эксперэ Н.Ф.Стручков, Мүрү нэһилиэгин дьокутааттарын сэбиэтин бэрэссэдээтэлэ О.Ф.Федоров, “Мосты Севера” ХЭТ дириэктэрин эбээһинэһин толорооччу П.П.Николаев быстылар.

Онтон Петр Иванович Попов маннык тыл эттэ: “Ытыктабыллаах Николай Филиппович, Прокопий Павлович, бүгүҥҥү үөрүүлээх тэрээһиҥҥэ мустубут бары ыалдьыттар биир дойдулаахтарым, эһигини бука барыгытын Уус Алдан улууһа муниципальнай тэриллии дьаһалтатын, оройуон сэбиэтин ааттарыттан кэтэһиилээх, үөрүүлээх муостабыт арыллар уонна үлэҕэ киирэр күнүнэн эҕэрдэлиирбин көҥүллээҥ. Бу муоста нэһилиэк эрэ буолбакка, улуус сайдарыгар улахан суолталаах буолар. Тоҕо диэтэргит, муостабыт сайдыыны түстүүр тутуу матырыйааллара буоллун, маҕаһыыннарбыт астара-үөллэрэ бу муостанан айаннаан кэлэр. Онон Мүрү нэһилиэгин уонна хоту нэһилиэктэр сайдыыларын түстүөҕэ диэн эрэнэбит. Бүгүн Уус Алдан дьоно-сэргэтэ үөрүүбүт улахан, түгэнинэн туһанан муоста тутуутун үбүлээбит СӨ Бырабыыталыстыбатыгар, үлэни иилээн-саҕалаан ыыппыт сакаасчыкка – СӨ суолга салалтатыгар, муостаны үрдүк хаачыстыбалаахтык туппут “Мосты Севера” ХЭТ-ҕэ олохтоохтор аатыттан барҕа махталбын тиэрдэбин”.

Бүгүҥҥү үөрүүлээх күҥҥэ П.П.Николаевка, И.Н.Москвитиҥҥа, В.В.Ефимовка, А.А.Васильевка Уус Алдан улууһун уонна Мүрү нэһилиэгин дьаһалталарын махтал суруктара туттарылыннылар. Ону тэҥэ олохтоохтору муоста тутуллубутунан СӨ суолга салалтатын сүрүн дириэктэрин солбуйааччыта А.К.Потапов, сүрүннүүр эксперэ Н.Ф.Стручков, Мүрү нэһилиэгин дьокутааттарын сэбиэтин бэрэссэдээтэлэ О.Ф.Федоров, “Мосты Севера” ХЭТ дириэктэрин эбээһинэһин толорооччу П.П.Николаев эҕэрдэ тылларын эттилэр.

Ол кэнниттэн ытыс тыаһын доҕуһуолунан саҥа муостаны бастакынан улахан кыамталаах массыыналар холкутук туораатылар. Даҕатан эттэххэ, Дэгэрэҥ муостатын курдук хаачыстыбалаах, ол муостанан дьон туорууругар диэн анал тротуардаах муоста Саха сиригэр аҕыйах сиргэ баар. Онон бу муоста үйэлэри уҥуордаан улуус сайдарыгар төһүү күүс буоллун, Уус Алдан үрэхтэрин туоратар өссө да элбэх муоста тутулла турдун.

 Айаал Молокотин, ulus.media

Тарҕат:

Комментарии

Защитный код Обновить