Тохсунньу 27 күнүгэр – 1965 сыллаахха Саха АССР Үрдүкү Сэбиэтэ Мииринэй оройуонун тэрийиигэ уураах таhаарбыта. Бу иннинэ тохсунньу 12 күнүгэр, РСФСР Верховнай Сэбиэтэ Мииринэй оройуона тэриллэригэр аналлаах уураах таhаарбыта. Ити курдук, Сунтаар уонна Ленскэй оройуоннарын сирдэриттэн холбоон Мииринэй оройуона тэриллибитэ.
Билигин Мииринэй куорат турар сирэ 1965 сыллаахха диэри, Сунтаар оройуонун сиригэр Чуона (Туой Хайа) нэhилиэгин административнай бас билиитигэр киирэрэ.
1955 сыллаахха урукку аатынан “Улахан тайахтаахха” (“МИР” алмаастаах туруупкатын ситимэ) кимберлиттэр булуллан, судаарыстыба бу сиргэ туохтан да саараммакка, куорат тутарга быhаарыныыны ылыммыта. Бу үрдүк суолталаах 55 сыллаах үбүлүөйү тохсунньу 27 күнүгэр, “Алмаас” култуура дыбарыаhыгар ньиргиэрдээхтик бэлиэтээтилэр. Мунньахха Госдума дьокутаата Г.Данчикова, Саха сирин Баһылыгын уонна бырабыыталыстыбатын дьаһалтатын салайааччыта А.Владимиров, алмаастаах кыраайга быһаччы сыһыаннаах Ил Түмэн дьокутааттара Ю.Николаев, М.Христофорова, “АЛРОСА” хампаанньа, “Профалмаас”идэлээх Сойуус бэрэстэбиитэллэрэ кыттыыны ыллылар. Бэрт үгүс иhирэх тыллар этилиннилэр. Киирии тылы ылбыт оройуон кулубата Р.Юзмухаметов, Мииринэй оройуонун тэриллиитин тиhиктэрин саас-сааhынан холобурдаата. Саха сирин бырабыыталыстыбатын аатыттан Афанасий Владимиров Мииринэй оробуочай кылааhын, “АЛРОСА” аадырыһыгар махтал, киэн туттуу тылларын эттэ: “Эhиги – мииринэйдэр, Саха сирин бырамыысалынаһыгар инники күөҥҥэ сылдьаҕыт. Эhигиттэн дойду бигэ туруктаах буолуута, быhаччы тутулуктаах”.
Мииринэй оройуонун Саха сиригэр сүҥкэн оруолун туһунан Ил Түмэн дьокутаата Юрий Николаев сүрдээх иһирэхтик, истиҥник тыл эппитин уҕараабат дохсун ытыс тыаһа доҕуһуоллаата. Даҕатан эттэххэ, бу киэһэ Мииринэй оройуонугар, Айхалга дьаһалта баһылыгынан Бүлүү ГЭС Күрүлгэнигэр дириэктэринэн үлэлээбит, Мииринэй ХБК-гар социальнай боппуруостарга дириэктэри солбуйбут Юрий Николаев, Мииринэй улууһун Бочуоттаах Олохтооҕун аатын чиэстээхтик ылла. Мантан салгыы оройуон сайдыытын туhугар сyдy кылааттарын киллэрбит дьон Махтал суруктары, бочуоттаах ааттары туттулар. Бырааhынньык киэhэтэ баай ис хоhоонноох кэнсиэринэн тyмyктэннэ.
Станислав Алексеев, Мииринэй куорат.
