Даҕатан эттэххэ, Мииринэйгэ үрдүк хамнас ылалларын туһунан истибит элбэх. Ол иһин Иркутскай уобалаһыттан, Бүрээтийэттэн ыалынан, уруунан көһөн кэлэллэр.
Иркутскайга диэри чэпчэтиилээх авиабилиэт сыаната 2 000 эрэ тахса солк. Көннөрү сыаната – 12 000 солк. Иркутскай уобалаһыттан Усть-Кут аэропуордуттан “ИрАэро” Ленскэйгэ көтөр буолла. Оттон Иркутскайтан Мииринэйгэ көтүү, Дьокуускайтан кэлэрдээҕэр быдан чэпчэки. Новосибирскайынан авиабилиэт сыаната 5,5 тыһ солк буолан, ыраах урууларбыт Кыргызстан дьоно туох да халҕаһалыы анньан кэлэллэр. Мииринэй хамнаһын ылаат, “амсайаат” да урууларын, доҕотторун, түҥүрдэрин-ходоҕойдорун ыҥырбытынан бараллар. Олохтоохтор туох эрэ дьиибэ биричиинэнэн хаалларбыт үлэлэрин ылаллар, хастыы да сиргэ үлэҕэ киирэллэр. Онон, Өрөспүүбүлүкэ таһыттан кэлэр дьоҥҥо Мииринэй “клондайк” тэҥэ. Кэлбит дьон сөҕөртөн ордубаттар. “Тыый, Мииринэйгэ курдук өлгөм хамнаһы биһиги төрүт түһээн да көрбөтөхпүт” дииллэр.
Оттон биһиги дьоммут үрдүк хамнастаах да үлэлэригэр сүгүн-саҕын сылдьыбакка быраҕан, Дьокуускайга күргүөмүнэн көһөллөрүн кубулуппаттар. Санатан эттэххэ, 2020 сыл саҥатыгар Мииринэй оройуонун үрдүнэн орто хамнас барыллаан ааҕыынан – 101 тыһ солк. Ол эбэтэр, Анаабыр улууһун кэнниттэн иккис миэстэҕэ турар. Оттон үһүс миэстэҕэ Ленскэй оройуона сылдьар. Саха сирин үрдүнэн орто хамнас 65 тыһ солк диэн чунуобунньуктар отчуоттууллар. Онон, Мииринэй үрдүк хамнастаах сиринэн сөпкө ааттанар. Бу “АЛРОСА” тэрилтэлэригэр сарбыйыылар, бүтүн ахсыс баабырыка сабыллыытын, МХБК үһүс баабырыката кыччааһынын, “Новай” сопхуос ТХМ-ҥа барыытын күөннэригэр маннык.
Мииринэй оройуонугар 11 тыһыынча биэнсийэлээх дьон баар. Биэнсийэ орто кээмэйэ бу cыл үүнүүтүгэр – 24 тыһ солк. Саха сирин үрдүнэн бастакы миэстэ. Маны учуоттаан эдэр-сэнэх дьон ыы-быччары туолбут, үлэ миэстэлэринэн тутах Дьокуускайы, кылгас бириэмэҕэ хаалларан, Мииринэй, Ленскэй диэки кэлиэххит этэ. Мииринэйгэ үлэлиирим тухары өлгөм хамнас, услуобуйа туһунан иһитиннэрэн, ыҥыран ахан биэрдим. Сүрдээх элбэх дьон маны туһаннылар. Махтанааччылар да бааллар. Билигин “АЛРОСА” тэрилтэлэриттэн Удачнайга эрэ үлэ баар. Ардыгар МУАД-ка, МАТП-га, Бүлүү эспэдьииссийэтигэр бакаансыйалар тахсаллар. Тэхиньиичэскэй идэтийиилээх буоллаххытына ньиэпкэ, гааска, “Якутскэнергоҕа” холонуҥ (ЗЭС тэрилтэҕэ үлэ баар).
Авиацияҕа хамнас үрдүк. Көтөр аал хамандыыра 300 тыһ солк хамнастаах буоллаҕына, алын састаап авиатехник, инженернэй да үлэһиттэр киһи мыыммат хамнаһын ылар буолуохтаахтар.
Бааннарга, атыыга-эргиэҥҥэ, мобильнай сибээскэ, бүддьүөт тэрилтэриттэн, дьаһалталарга, ДЬХХ-га, оскуолаларга, култуура эйгэтигэр киирэ сатааҥ. Көрдүүр киһи син-биир тугу эмэ булар.
Санатан эттэххэ, Мииринэй учууталлара бэркэ олороллор. Сорох уопуттаах, элбэх чаастаах учууталлар 200-300 тыһ солк хамнаһы аахсаллар. Доруобай эрдэххитинэ үлэлээн хаалыҥ. Кырдьар сааскытыгар дэлэй харчыта мунньунуҥ. Мииринэй биэнсийэлээхтэрэ кыахтаах, үптээх-астаах тэрилтэлэргэ үлэлээбиттэр, 50-70 тыһ солк ылар буолан олус холкулар.
Станислав Алексеев, Мииринэй куората.
