Бастатан туран, Мииринэй оройуонун нэһилиэнньэлээх пууннарын гаастааһын, бүгүҥҥэ диэри хайдах баран иһэрин туһунан аҕыйах тылынан маннык этиэххэ сөп: мөлтөх, хайҕанарбыт суохха дылы.
2001 сыллаахха сэтинньигэ, гаас күөх уота тырымныы умайбыт Таас-Үрэҕэр, күн бүгүнүгэр диэри олохтоохторго барыларыгар уматыгы киллэрэ иликтэр. Былырыын нэһилиэк дьаһалтатын улахан туруорсуутунан, “ИНК” хампаанньа көмөтүнэн уон дьиэ гаастаммыта. Оттон Мииринэй куоракка чааһынай дьиэлэр оройуоннарыгар, гаас тумуга кэлбитэ төһө да ырааппытын иһин, гаастааһын тэтимэ бытаан. Алмаастаах кыраай киинигэр 50-чэ дьиэ гаастанна. Балары уонна Таас-Үрэҕи ааҕан туран балтараа сүүс дьиэҕэ эрэ күөх төлөн умайда.
Бу Мииринэй курдук кыахтаах, модун тэхиньиичэскэй баазалаах улуус холугар олус аҕыйах. Гаас ситимэ уһаты тардыллан, тумуга олбуордар ыксаларыгар тириэрдиллибит дьиэлэргэ, күөх төлөн умайыыта түргэтиэн сөп. Гааһы дьиэҕэ киллэттэрэргэ туох ирдэнэрий? Бастатан туран, тэхиньиичэскэй усулуобуйа. Маннык докумуону оҥотторорго уонна гааһы киллэттэрэргэ, “АЛРОСА-Гаас” тэрилтэни кытта үлэлиир ирдэнэр. Ону таһынан, дьиэни гаастааһын хаартата наада. Ол эбэтэр, олбуоруҥ хайа өттүнэн гаас турбата дьиэҕэр киирэрин туһунан. Хочуолу дьиэҕэ туруоруу, гаас билиитэтин аҕалыы, төһө уматык туттулларын кээмэйдиир учуоччук туруоруу ирдэнэр. Балачча бириэмэни гаас утумун олбуорга таҥыы ылар.
2018 сыллаахха чааһынай дьиэҕэ гаас киллэриитигэр 150 тыһ солк ороскуоттанар эбит буоллаҕына, билигин 200 тыһ солк суох саараммаккын даҕаны. Өссө төгүл этэбин, гаастааһын тустаах далааһынын хаба илик.
Станислав Алексеев, Мииринэй куората. Ааптар хаартыскалара.
