Ол курдук күнүс, киэһэ буоллун, Мииринэй куорат уулуссаларыгар дьон тобус-толору буолар. Массыына – элбэх.
Сарсыарда эрэ өттүгэр куорат арыый да иһийэр. Эбиэт диэки массыынанан, дьонунан туола түһэр. Бары боруоппустаах сылдьалларыгар саарбахтыыбын. Сорохтор суостаах дьаҥтан харыстанар мааската суох сылдьаллар. Бөлөҕүнэн сылдьааччылар да элбэхтэр. Киэһэ аайы ыччат 26-с уонна 12-с №-дээх оскуолалар былаһааккаларыгар мустар. Хаһыылара-ыһыылара сүрдээх. Куорат пааркатыгар атыы-эргиэн кииннэрин аттыгар, киэһэ хойукка диэри туох да дьарыга суох сылдьар ыччаты ким да дьарыйбат. Мииринэйгэ бэҕэһээ түөрт киһи хоруона хамсыгар ылларбыта билиннэ. Госпитальга, ону тэҥэ урут ыалдьыбыт ньиэп уонна гаас салаатын үлэһиттэрэ бааллар. Барыта холбоон уонча киһи буоллулар. Биир, икки өттүн ойоҕостоппут киһи “кыһыл” ковид салаатыгар сытар. Тыҥатын харыстаан ИВЛ аппараатыгар холбооботулар. Куоракка үс обсерватор баар: “Горняк” сонотуоруйга, МПТИ Московскай уулуссатыгар баар уопсайга, наркология балыыһатыгар. Удачнайга уонна Айхалга эмиэ бааллар. Баларга уопсайа 300-чэ киһи сытар. Аһылыктара, олоруулара – босхо. Интэриниэт, вай-файд баар. Таһырдьа эрэ тахсыбаттар. Баахта үлэһиттэрин полиция маныыр. Обсерватордарга сытар дьоҥҥо, тэрилтэлэрэ, больничнай аһыллар. Хааччахтара бүтэн үлэлэригэр тахсалларыгар, “Бу киһи доруобай, тулалыыр дьоҥҥо кутталы үөскэппэт” диэн балыыһаттан ыспараапка ылаллар. “Самоизоляцияҕа” оройуон үрдүнэн 800-чэ киһи олорор. Кинилэр 14 күн толору дьиэлэригэр олоруохтаахтар. Ону уора-көстө кэһэллэрин туһунан дьон аһаҕастык кэпсиир. Алмаастаах кыраай киинигэр, Мииринэй балыыһатын уонна Роспотребнадзор кичэллээх бэрэбиэркэлэрин түмүгэр, “Сovid-19” хамсыга улаханнык тура илик. Соҕурууттан дьон кэлиитэ кыратык да хааччахтанара буоллар, балаһыанньа син ортоһуор буолуо эбит. Оттон атын куораттартан сөмөлүөттэр кэлбиттэрин курдук кэлэ тураллар. Кэлии-барыы оройуона буоламмыт, балаһыанньа билиҥҥи курдук аматык буолуо диэн мэктиэ суох.
Станислав Алексеев. Мииринэй куората. Ааптар хаартыскалара.
