Войти

Войти

Амма улууһун Абаҕатыгар үөрүүлээх быһыыга-майгыга саҥа оскуола-саад бастакы сыбаайатын түһэрдилэр.

Билигин орто оскуолаҕа 134 оҕо үөрэнэр. Быйыл оскуоланы 18 оҕо бүтэрбит, аҥаардара – туйгун сыанаҕа үөрэнэн түмүктээбиттэр. Оскуола өссө 1971 сыллаахха тутуллубут мас дьиэҕэ үөрэнэр. Оскуола аҥаарын хаарбах туруктаах диэн сабарга күһэллибиттэр.

Саҥа сыбаайаны түһэрэр үөрүүлээх тэрээһиҥҥэ Ил Дархан Айсен Николаев кыттыыны ылбыт. Ил Дархан оскуола тутуутун туһунан быһаарыы 2018 сыллаахха ылыллыбытын, икки сыл устата бырайыактыыр симиэтэ докумуона оҥоһуллубутун уонна судаарыстыбаннай эспэртиисэни ааспытын бэлиэтээбит.

“Саҥа таас оскуоланы саҥа үөрэх дьылын саҕаланыыта тутан саҕалыырбыт – бэлиэ түгэн. Эһиил номнуо Абаҕа оҕолоро саҥа, сырдык оскуолаҕа үөрэниэхтэрэ. Кинилэртэн дойду киэн туттар дьоно үүнэн тахсыахтара диэн эрэнэбин”, - диэтэ Айсен Сергеевич.

Саҥа оскуола туох баар аныгы ирдэбиллэргэ эппиэттэһэр буолуоҕа. Остолобуой, бибилэтиэкэ, аактабай саала, көмпүүтэр кылааһа, аныгы тэрилинэн хааччылыбыт кылаастар баар буолуохтара.

Тарҕат:

Добавить комментарий