КОВИД-19 утары охсуһар оперативнай штаб, “АЛРОСА” Эмтиир Киинэ, Мииринэйдээҕи оройуоннааҕы балыыһа(МЦРБ) “Алмаастаах кыраай” теле-араадьыйа хампаанньатыгар биллэрбиттэринэн, балаһыанньа көнө илик. Инфекционнай балыыһа хоруоналаах дьон сытар госпиталыгар – 31, провизордар салааларыгар – 54 ыарыһах сыталлар. 87 киһи тастан эмтэнэр.
Ыарыһах үксүү турар диэтилэр.
Иллэрээ күн, суукка устата, 18 киһи хоруонанан ыалдьыбыта бигэргэтиллибитэ. Ааспыт сууккаҕа – 5. Ол иннигэр 13 ыарыһах бэлиэтэммитэ. Бүгүҥҥү туругунан, Мииринэй оройуонун үрдүнэн, 115 киһи хоруона ыарыытыгар ылларбыт, эмтэнэр.
Соҕурууттан, уоппускаларыттан кэлбит дьон элбээһиннэринэн сибээстээн, балаһыанньа сытыырхайда. Хоруона хамсыга Удачнайга, Айхалга тарҕана турар. Удачнай балыыһатыгар аҕыс киһи, хоруона ыарыылаах сытар. Тастан 56 киһи эмтэнэр.
Инфекционист эмчиттэр сөтөллөөх, температуралаах ыарыыга уорбаланар дьонтон анаалыс ылан Мииринэйдээҕи иммунология лабораториятыгар бэрэбиэркэҕэ биэрэллэр. Олор үксэ бигэргэнэллэр. Ол анаалыстары салгыы өрөспүүбүлүкэтээҕи доруобуйа харыстабылын министиэристибэтин иммунологиятын лабораториятыгар чопчулаталлар. Бу дьон үтүөрэллэрин, тыыннаах хаалалларын туһугар быраастар күүстэрэ кыайарынан үлэлии сылдьаллар.
Хоруона хамсыга туруоҕуттан ыла, Мииринэйгэ 645 киһи ыалдьыбыт. Билиҥҥэ диэри ыарыыга хаптарбыт ахсаана үксүү турар. Хоруона хамсыгын утары инники күөҥҥэ - ковидтаах “кыһыл” зонаҕа үлэлии сылдьааччылар, Мииринэй балыыһатын бары да эмчиттэрэ, олус сылайдылар. Эбиитин, эмчиттэр ыарыһахтартан сутуллар түбэлтэлэрэ тахсар.
Маннык түгэҥҥэ, өрөспүүбүлүкэ доруобуйаҕа харыстабылын министиэристибитэтиттэн Мииринэй балыыһатыгар балаһыанньаҕа эппиэттэһэр өйөбүл оҥоһуллара ирдэнэр.
... Алмаастаах кыраай саас буулуоҕуттан арахсыбакка сылдьар хамсыгы утары охсуһуу күһүҥҥү эппиэттээх кирбиитигэр кэллэ. Онон, бука диэн бэйэҕитин харыстаныҥ, сэрэтэр миэрэлэри тутуһуҥ, мааскаҕытын умнумаҥ, антисептиктары туһаныҥ.
Станислав Алексеев. Мииринэй куората.
Ааптар уонна Мииринэй балыыһатын саайтыттан хаартыскалар.
