Мииринэйгэ, олус өр тохтобул кэнниттэн, бастыҥ хааччыстыбалаах, сибиэһэй бородууксуйанан хааччыйыыга “Юбилейнай” эргиэн Киинигэр бастакы тэрээhин ыытылынна.
Тэрийээччи – Мииринэй куоратын дьаһалтата.Өр кэмҥэ сибиэһэй эти амсайбакка, хараарҕаан ахан олордубут. Онон, бу кyннэргэ «Идэһэ» өрөбүл күн дьаарбаҥката ыытыллан, сүрдээҕин көнньүөрдүбүт. «Юбилейнайга» эргиэн Киинигэр кэлбит дьон, атыылааччы аҕыйаҕыттан мунчаара быһыытыйдылар. Саатар ыраах сирдэртэн атыылыы кэлбит дьону, тыал-хахсаат кэмигэр таһырдьа туруордулар. Ол да үрдүнэн, саха дьорҕоот дьоно, таһырдьа тыалы, дьыбары аахсыбакка олус бэркэ атыылаатылар.
Уһун-Күөлтэн Светлана Павлова уонна Юрий Павлов хаһаайыстыбалара кэлбиттэр. Ынах этин итирин-иһин аҕалан, удамыр сыанаҕа атыылаан сүрдээҕин сэргэхсийдибит. Хаһаанныбыт. Аны, тыаттан хаһан кэлэн атыылыллара биллибэт.Оттон «Чурапчы» ТХКП ынах арыытын Мииринэй гиэнинээҕэр лаппа чэпчэки сыанаҕа атыылаан, балачча уочарат буола сырыттта.
Онон, сибиэһэй эт, арыы аҕалан атыылаабыт дьоҥҥо олохтоохтор махталбытын биллэрэбит.
Станислав Алексеев. Мииринэй куорат. Ааптар хаартыскалара.
