2025 сыл олунньу 1 күнүттэн бастакы оҕоҕо бэриллэр “Ийэ хапытаала” 756 700 солк, оттон иккис уонна үһүс оҕоҕо – 1 000 000 солк. буолуон сөп. Өскөтүн Судаарыстыбаннай Дуума дьокутааттара киллэрбит докумуоннарын ылыннахтарына. Сокуон барылын дуума электроннай базатыгар таһаарбыттар.
Саҥа барылы сенатор Елена Афанасьева уонна ЛДПР, КПРФ, “Сиэрдээх Арассыыйа” баартыйалар дьокутааттара кыттыһан оҥорбуттар. Кинилэр “Оҕолоох дьиэ кэргэннэри өйүүр эбии судаарыстыбаннай миэрэлэр тустарына” сокуон 6 ыстатыйатын уларытар санаалаахтар.
Сокуон барылын быһаарыытыгар сурулларынан, ийэ хапытаала бырагыраамаҕа хапсар дьон улахан аҥаара – 7,9 мөл. ыал – хапытаал харчытын олорор усулуобуйаларын тупсарарга туһаммыттар. Төлөбүр кээмэйэ сыл аайы индексацияланар. Холобур, быйыл олунньу 1 күнүгэр 7,4%-нан үрдээн, бастакы оҕоҕо 630 400 солк., иккискэ – 833 000 солк. буолбута. Ол гынан баран, бырайыак ааптардара этэллэринэн, дьиэ сыаната үрдээбитинэн, ити сууманы улаатыннарыахха наада.
Саҥа барыл олоххо киирдэҕинэ, 2025 сыл олунньу 1 күнүттэн бастакы оҕо иһин 756 700 солк., оттон иккис уонна үһүс оҕо иһин 1 мөл. солк. бэриллэр буолуон сөп.
Санаттахха, кулун тутар 1 күнүгэр Судаарыстыбаннай Дуумаҕа ийэ хапытаалын бырагырааматын болдьоҕо суох уһатар сокуон барылын эмиэ киллэрбиттэрэ. Билигин ити төлөбүр 2007 с. тохсунньу 1 күнүттэн 2026 с. ахсынньы 31 күнүгэр диэри төрөөбүт оҕолорго эрэ бэриллэр. Барыл быһаарыы суругар ыйылларынан, төһө даҕаны ийэ хапытаала бэриллэр буолбутун иһин, Арассыыйа нэһилиэнньэтэ айылҕатын быһыытынан (естественно) аҕыйыы турар. Ол курдук, 2020 сыллаахха 700 000 киһи, 2021 с. – 1,043 мөл. киһи, 2022 с. – 599 600 киһи, оттон былырыын төрөөбүт киһитээҕэр 495 300 киһинэн элбэх киһи өлбүт.
Бэй.кэр.
Хаартыска: Shutterstock
