Ааспыт сыл ахсынньытыгар Ньурба улууһугар баһылык Алексей Иннокентьев туттарар 500 тыһ. солк. гранын Киров ситэтэ суох оскуолатын биисинэс-инкубатора аччыгый бэкээринэ арыйар бырайыагынан сүүйбүтэ.
Чох баайдаах Киров дьоҕус сэлиэнньэтэ Хатыҥ Сыһыы (Марха) нэһилиэгэр сыстар. Үйэ аҥаарын устата Кировка бэкээринэ суох буолан эрэй бөҕөтүн көрөн олорбута. Кировка килиэби аттынааҕы Мархаттан эрэ тиэйэллэрэ. Ордук от кэмигэр килиэп тиийбэккэ сор бөҕөтүн көрдөрөрө. Георгий Добрецов салайар Киров ситэтэ суох оскуолата улуус баһылыгын 500 тыһ. солк. субсидиятын ылбыта. Ол харчынан Новосибирскайтан аччыгый бэкээринэ тэрилин атыылаһан бу күннэргэ аҕалан туруордулар уонна үөрүүлээх быһыыга-майгыга арыйдылар.
Ньурбатааҕы биисинэс-инкубатор салайааччыта Ньургуйаана Михайлова:
— Улууска олохтоох бэйэ бородууксуйатын оҥорон таһаарыыны өйүүргэ улахан үлэ ыытыллар. Баһылык маннык гранын урукку өттүгэр Ньурбатааҕы лиссиэй уонна Ньурба куоратын 1-кы №-дээх орто оскуолата ылан турар. Үөрэнээччилэри урбаан эйгэтигэр билиҥҥиттэн сыһыаран үлэлэтии аныгы кэм ирдэбилинэн буолар. Кировтар маннык дьоҕус бэкээринэлэммиттэрэ улахан социальнай суолталаах.
Киров ситэтэ суох оскуолатын дириэктэрэ Георгий Добрецов:
— Биһиги нэһилиэкпитигэр 300 киһи олорор. Оскуола 43 үөрэнээччилээх. Улуус баһылыгын 500 тыһ. солк. гранын таһынан, бэйэбит эбии 100 тыһ. солк. эппиппит. Оскуола иһинэн маҕаһыын арыйар былааннаахпыт. Грант 250 тыһ. солк. тэрили атыылаһыыга биэрбиппит. Онтон 250 тыһ. солк. маҕаһыын тутуутугар укпуппут. Оскуолатааҕы биисинэс инкубатор салайааччыта, эдэр урбаанньыт Савва Николаев үлэлэтэр. Кини кэргэнэ Антонина Николаев минньигэс, сибиэһэй килиэбин нэдиэлэҕэ үстэ астаан таһаарар. Күҥҥэ сүүс килиэби оҥорон таһаарар. Биһиги өрүс үрдүгэр турар буоламмыт, инникитин балык уонна убаһа этин ыыһыыр аччыгый коптильня үлэлэтиэхпитин баҕарабыт.
Саҥа бэкээринэ үөрүүлээх аһыллыытыгар улуус баһылыга Алексей Иннокентьев, кини көмөлөһөөччүтэ Данил Федоров, олохтоох урбаанньыт Ариан Моргусов, Хатыҥ Сыһыы баһылыга Василий Васильев, Ньурбатааҕы биисинэс-инкубатор салайааччыта Ньургуйаана Михайлова, олохтоохтор кытыннылар.
