От ыйын 27 күнүттэн тимир суол “Аллараа Бэстээх” ыстаансыйаттан дьону тиэйэр бастакы поезд айанныыра былааннанар. Дьоҥҥо табыгастаах буоллун диэн, Дьокуускай куорат автовокзалыттан Аллараа Бэстээххэ диэри оптуобустар сылдьар буолуохтара.
СӨ бырабыыталыстыбатын бастакы вице-премьерэ Алексей Колодезников иһитиннэрбитинэн, Дьокуускай куорат автовокзалыттан Аллараа Бэстээх ыстаансыйатыгар диэри уонна төттөрү оптуобустар сылдьар буолуохтара. Ол туһунан суолга сэрэхтээх буолууну хааччыйар бырабыыталыстыба хамыһыйатыгар, “Автовокзал” тэрилтэ генеральнай дириэктэригэр Саргылана Готовцеваҕа сорудах биэрбит.
“Дьокуускайтан Аллараа Бэстээххэ диэри дьон туох да кыһалҕата суох сылдьыахтарын наада. Сайыҥҥы кэмҥэ өрүс пуордуттан айанныахтарын эмиэ сөп. Атырдьах ыйын саҥатыттан Аллараа Бэстээххэ холкутук айанныыр курдук үлэни ыытыҥ. Саамай сүрүнэ – дьоҥҥо табыгастаах буолуохтаах”, — диэн Алексей Колодезников эттэ.
Кини саҥа оптуобус атыылаһыллыан сөбүн туһунан бэлиэтээтэ. От ыйын 15 күнүгэр диэри автовокзал салалтата саҥа маршрут бырайыагын бэлэмниэхтээх.
