“Best Way” дьиэ-уот кэпэрэтиибин үлэһиттэрэ куорат олохтоохторугар кэпэрэтиипкэ киирии туһунан кэпсииллэр. СӨ Госстройжилнадзор салалтата дьон саарбах тэрилтэлэргэ киирбэттэригэр ыҥырар.
Кэпэрэтиип үлэһитэ кэпсииринэн киирии төлөбүрэ 2040-1020 евроҕа тэҥнэһэр. Бу Киин баан валютатын сыанатыттан тутулуктаах. Ону таһынан, пайщик дьиэтин күлүүһүн ыла да илик буоллаҕына ый аайы 2000-1000 солк чилиэнскэй усунуос төлүүр.
“Кирэдьиит ылар устуоруйалара кэһиллибит эбэтэр бастаан угар харчылара суох дьон кэпэрэтиипкэ киириэхтэрин сөп диэн кэпсииллэр. Гарантия туһунан ыйытыкка кэпэрэтиип үлэһитэ РФ дьиэ-уот кодексын 5-с баһын ааҕарга сүбэлээтэ. Кини кэпсииринэн кэпэрэтиип Дьокуускайга үлэлээбитэ хас да сыл буолбут. Киниттэн уратын өссө үс киһи пайщик дьиэлэммиттэр”, – диэн Госстройжилнадзор релиһигэр суруллар.
Бу кэпэрэтиип кыбартыыралары холбоһон үбүлээһин ньыматынан ылар. Пайщиктар кыбартыыра сууматыттан 35%-50% харчы угаллар. Сөптөөх үп мунньулуннаҕына кыбартыыра атыылаһыллар уонна кэпэрэтиипкэ суруйаллар. Уонна бастакынан элбэх суума харчыны укпут киһиэхэ бэриллэр.
Маннык ньыманан “Строим вместе”, “Битяй”, “Татта”, “Стерх”, “Новый дом” диэн кэпэрэтииптэр үлэлээбиттэрэ. Кинилэр буруйдарынан үгүс дьон дьиэтэ да, харчыта да суох хаалбыттара диэн Госстройжилнадзор бэлиэтиир.
“Сокуон хараҕынан бары эппиэккэ тардылла иликтэр, албыннаппыт дьоҥҥо харчыларын ким да төнүннэрэ илик. Сорох долевой дуогабардаах дьон реестрга киирбиттэрэ уоннааҕыларга аккаастаныллыбыта. Санатар буоллахха, билиҥҥи туругунан кэпэрэтииптэр пайщиктара “Об участии в долевом строительстве…” диэн 214 №-дээх ФС “обманутые дольщики” диэн бөлөҕөр киирбэттэр. Инньэ гынан, судаарыстыба өйөбүлүгэр эрэнэр, укпут харчыларын төнүннэрэр кыахтара суох” – диэн Госстройжилнадзор иһитиннэрэр.
