Дьокуускай куоракка балаҕан ыйын иккис декадатыттан сылааһы биэриэхтэрэ. Бу туһунан “Якутскэнерго” пресс-сулууспата иһитиннэрэр.
“Атырдьах ыйын 26 күнүнээҕи көрдөрүүнэн, 1102 м магистральнай уонна 4303 м квартальай итиинэн хааччыйар ситим өрөмүөннэннэ. 7330 м итии уу уонна 2605 м тымныы уу турбаларыгар өрөмүөн үлэтэ ыытылынна. Магистральнай ситим 6150 м-гэр бүрүйүүлэр саҥардылыннылар”, — диэн пресс-сулууспаҕа бэлиэтииллэр.
Саамай улахан өрөмүөн үлэтэ Центральнай уокурукка ыытыллыбыт, ол курдук манна 4,4 км оҥоһуллубут. Оттон Строительнайга — 3,9 км, Промышленнайга — 3,5 км уонна Гагаринскай уокурукка 2,8 км үлэ барбыт.
Энергетиктэр этэллэринэн, сыл саҥатытан теплотрассаны уматыы 20 тахса түбэлтэ бэлиэтэммит. Ол түмүгэр матырыйаал умайан, турбалар ууллаллар уонна алдьаналлар. Онтон тэстэр буолаллар уонна баттааһына түһэр. Оччоҕо дьон сылааһа суох хааллаллар диэн иһитиннэриигэр суруллар.
Маннык түгэн бу күннэргэ буолбут. Күлүгээттэр аэропорт оройуонугар баар Можайскай уулуссатын 17/2 уонна 19 дьиэлэрин турбатын умаппыттар. Манна суһал өрөмүөн үлэтэ ыытыллыан наада. Хоромньу 250 тыһ солк тахсыбыт.
