Бэҕэһээҥҥи туругунан, Дьокуускайга элбэх кыбарыытараалх олорор дьиэлэр подъезтарын санитарнай ыраастааһын, дезинфекциялааһын 64 бырыһыан хабыллан ыытыллыбыт. Бу туһунан куорат дьаһалтатын пресс-сулууспата иһитиннэрэр.
Гагаринскай уокурук 115 дьиэтэ 100% хабыллыбыт, оттон Октябрьскай уокурукка – 99% (236 дьиэ). Пригороднай, Табаҕа, Марха, Кангаласс түөлбэтигэр 96 бырыһыан хабыллыбыт. Атын уокруктарга ортотунан 40-70 бырыһыан. Хлордаах препараттарынан уопсай туһаныы эбийиэктэрин, ол иһигэр дьиэ подъезтарын нэдиэлэҕэ иккитэ ыраастыахтаахтар. Оттон күн ахсын киһи илиитинэн тутар ньуурдарын (аан тутааҕын эҥин) хлорунан сотуохтаахтар. Өскөтүн салайар хампаанньа эбэтэр ТСЖ эһиги дьиэҕитигэр маннык үлэни ыыппатах буоллаҕын куорат ЕДДС эрийэн биллэриҥ: 44-42-29, 44-42-51 эбэтэр Гостройжилнадзорга: 34-50-53, 34-26-44.
