Чурапчы улууһугар булчуттар ортолоругар “Чурапчыга Ньукуолун күнэ” диэн аһымал аахсыйа саҕаланна. Ол курдук, ыам ыйын 20 күнүгэр диэри булчуттартан кус-хаас туталлар. Ону Ньукуолун күнүгэр ытык кырдьаҕастарыгар, бэтэрээннэригэр бэлэхтииллэр. Быйылгы аахсыйаны эдэр урбаанньыт Айсен Толстоухов көҕүлүүр. Ол курдук, байанай бэлэҕин таһынан бэйэтин маҕаһыыныттан бородуукта биэрэргэ быһаарыммыт.
“Бу олус үтүө аахсыйа буолар. Чурапчы ыччата өбүгэ үгэһин куруук өйдүү-саныы сылдьарын таһынан, үтүө дьыаланы оҥороро кэрэхсэбиллээх. Билигин маннык аахсыйалар үтүө үгэскэ кубулуйдулар”, – диэн улуус баһылыга Андрей Ноговицын эттэ уонна бу көҕүлээһини атын улуустар эмиэ өйүүллэригэр ыҥырда.
Ол курдук улуус хас да нэһилиэгэр, сыл аайы Ньукуолун күнүгэр аҕа саастаах дьоҥҥо сааскы булду амсаталлар. Оттон Хадаар, Мугудай нэһилиэктэрин олохтоохторо улахан остуол тардан биир дойдулаахтарын кус миининэн, алаадьынан күндүлүүллэр.
