Соҕуруу Кэриэйэ Кёнсанбук-до куоратын парламенын бэрэссэдээтэлэ Чан Гён Сик, Саха сиригэр көмө ыытарга бэлэмнэрин туһунан сурук ыыппыт. Бу туһунан Ил Түмэн пресс-сулууспата иһитиннэрэр.
Кёнсанбук-до куорат парламена уонна Ил Түмэн бииргэ үлэлиир туһунан сөбүлэҥи ааспыт сыл бэс ыйыгар түһэрсибиттэрэ. Алтынньы ыйга Ил Түмэн дэлэгээссийэтэ Кёнсанбук-до куоракка ыалдьыттаан кэлбитэ.
Муус устар ый бүтүүтэ Кэриэйэ өрөспүүбүлүкэтиттэн мэдэссиинэ мааскаларын баартыйатын “Антирак: поддержка выживших” диэн Капитолина Алексеева уопсастыбаннай хамсааһына, ону таһынан Саха сирин доруобуйа харыстабылын хас да тэрилтэтэ ылбыта. Бу көмө “Саха-Кэриэйэ доҕордоһуутун Ассоциацията” уопсастыбаннай түмсүү чэрчитинэн оҥоһуллубута.
