Кострома уобалаһын Чухломской оройуонун Повалихинскай сэлиэнньэтин баһылыгынан Марина Угодскаяны талбыттар. Бу туһунан уобаластааҕы быыбар хамыыһыйата иһитиннэрбит.
Дьахтарга быыбардааччы 61,7 бырыһыана куоластаабыт.
Угодская баһылыктаан олорбут Николай Локтевка суос-соҕотох утарсааччы эбит. Локтев быыбарга 34 бырыһыаны эрэ ылбыт. Быыбар кэмигэр Марина Угодская олохтоох дьаһалтаҕа муоста сууйааччынан үлэлээбит, дьэ, билигин аны баһылык буола түстэ. Угодскаяны быыбарга техническэй кандидат быһыытынан турунарга Локтев бэйэтэ көрдөспүт.
“Локтевы кытары ким да киирсиэн баҕарбатаҕа, биир да киһи суоҕа. Ол иһин Локтев “баһаалыста быыбарга турун” диэн көрдөспүтэ. Мин кини көрдөһүүтүн быһа гымматаҕым. Миигин талыахтара диэн өйбөр да оҕустарбатаҕым, ханнык да аҕытаассыйаны эҥин ыыппатаҕым. Докумуоммун туттаран баран тугу да гымматаҕым ээ. Соһуйуом иһин, миэхэ 84 киһи куолаһын биэрбит, оттон Локтевка – 48”, - диэн Угодская иһитиннэрбит.
“Мин туох эбээһинэстээхпин да билбэппин. Бэһис сылбын муоста сууйа сылдьыбытым. Отутуска дылы муостаҕын сууйаҕын диэбиттэрэ, онтон туох буоларын өйүм хоппот. Дуоһунаска киириэхтээх үһүбүн уонна боломуочуйабын толорбутунан барар үһүбүн. Мин үйэбэр докумуону кытары бодьуустаспатаҕым...”, - диэн саҥа талыллыбыт баһылык сонньуйан кэпсээбит. Кини дэриэбинэҕэ чопчу хас киһи олорорун да билээхтээбэт үһү.
