"ХотуБакт" диэн Саха сиринээҕи билим киинин билим-производственнай тэрилтэтэ 2020 сылга 3 мөл. солк. суумалаах ветеринарнай вакцинаны оҥорон атыылаабыт. Сахалар оҥорбут вакциналарын Новосибирскай уобалас, Тыва уонна да атын дойду эрэгийиэннэрэ атыылаһан туһаммыттар. Бу туһунан киин дириэктэрэ Михаил Неустроев кэпсээбит.
"Биһиги кииммит сылгыга хабарҕаһыт инфекционнай ыарыытын (мыт лошадей) утары вакцинаны айбыта, бу ыарыы ордук кулуннарга, убаһаҕа тарҕанар. Маны таһынан сальмоноллезстан сылтаан төрүөх куотуутун инфекционнай ыарыытын утары эмиэ вакцинаны айбыппыт. Маннык вакциналар Арассыыйаҕа суохтар. Аан бастакы хабарҕаһыт ыарыытын ураты вакцинаны 1998 сыллааха оҥорбуппут, оттон сальмоноллезстан төрүөх куотуутун утары вакцинаны - 2000 сыллаахха", - диэн Михаил Неустроев кэпсээбит.
Учуонай этэринэн, Саха сирин 42 бырыһыан биэтэ төрүөҕү биэрбэттэр. Ол - биэ инфекционнай ыарыыга хаптарарыттан сылтаан тахсар.
"ХотуБакт" оҥорон таһаарбыт вакциналарын Новосибирскай, Алтаай, Тыва уонна да атын эрэгийиэннэр сылгыһыттара уонна Казахстантан анаан-минээн атыылаһан киэҥник туһаналлар эбит. Бу иннинэ премьер Андрей Тарасенко Саха сиригэр оҥоһуллубут ветеринарнай вакциналары киэҥник тарҕатарга күүскэ үлэлэһэргэ сорудахтаан турар.
