"Куттала суох уонна хаачыстыбалаах айан суола" национальнай бырайыак иитинэн быйыл өрөспүүбүлүкэҕэ 210 км өрөспүүбүлүкэ суолларын нуормаҕа эппиэттэһэр гына оҥоруохтара. Бу туһунан "Управтодор" генеральнай дириэктэрин солбуйааччы Анатолий Павлов кэпсээбит.
"Уопсайа 25 эбийиэккэ үлэ барыахтаах, олортон 17-гэр номнуо судаарыстыбаннай хантыраак баттаммыта, ити - 130 км тахса суолга", - диир Павлов. Оттон атын эбийиэктэргэ симиэтэ эҥин оҥоһуллар, бу сыл бастакы кыбаарталыгар дылы хантыраак баттаныахтаах.
