Роспотребнадзор сэтинньи 15 күнүттэн маассабай тэрээһиннэри сабыылаах сирдэргэ (саалаларга, хосторго, аудиторияларга, хабыныаттарга уо.д.а.) 70% диэри толору дьонноох маассабай тэрээһиннэри оҥорорго көҥүл биэрдэ. Маныаха киирээччилэр уонна кыттааччылар QR-куоттаах буолаллара ирдэнэр.
Бу туһунан Арассыыйа судаарыстыбатын кылаабынай санытаарынай бырааһа Анна Попова ыйааҕар суруллубут уонна бэнидиэнньиктэн, сэтинньи 15 күнүттэн олоххо киирбит. Ол эрэн, Саха сирин Роспотребнадзора иһитиннэрэринэн, бу маннык быһаарыныы өрөспүүбүлүкэбитигэр киирэ илик. Вице-премьер уонна суһал ыстаап салайааччытын солбуйааччыта Ольга Балабкина бу туһунан «кэпсэтии бара илик» диэн этэр.
Ыйаахха суруллубутунан:
- тэрээһиҥҥэ кыттааччы ахсаана ыытыллар миэстэтин иэнэ төһө улаханыттан-кыратыттан тутулуктаах;
- Быһыыны ылбытын уонна ыалдьан ааспытын туһунан QR-куот кыттааччыларга эрэ буолбакка тэрээһини ыытааччыларга эмиэ баар буолуохтаах;
- тэрээһини ыытааччы тэрилтэ эрэгийиэн толорор былааһын уорганыгар сайаапка ыытыахтаах. Тэрээһини ыытарга олохтоох былаас кылаабынай санытаарынай бырааһыттан көҥүлү ылан баран быһаарыныы ылыныллыахтаах.
Санатар буоллахха, өрөспүүбүлүкэҕэ маассабай тэрээһиннэри ыытыыга саала иһэ 50%-н толору буолуо суохтаах. Маныаха тэрээһин кыттыылаахтара быһыыны ылбыттарын уонна ыалдьан ааспыттарын туһунан QR-куоттарын көрдөрүөхтээхтэр.
