Прогресс биир сиргэ турбат. Англия биир стартап тэрилтэтэ DogPhone диэн ытыҥ эйиэхэ төлөпүөннүүр тэрилин айбыт. Гаджет сымнаҕас мээчик курдук оҥоһуулаах. Ыт мээчиги таскайдаан, тииһинэн убахтаан бардаҕына, хаһаайын ноутбугар видеозвонок буолан кэлэр. Хаһаайын ноутбуга тыаһаатаҕына ытыгар эппиэттиэн да, эппиэттээмиэн да сөп.
Кини ытыгар эмиэ эрийиэн сөп. Хаһаайына тугу этэрин истэригэр ыт мээчигин хамсатыахтаах. Бу төһө наадалаах тэрил эбитин билбит суох. Ыттар да бу үрдүк технология оҥоһуга кинилэргэ туох кыаҕы биэрэрин толору өйдүүллэрэ биллибэт.
Атыыласпыт дьон ыттар алҕаска таарыйан субуоннууллар быһыылаах дииллэр.
Ол эрээри, айааччылартан биирдэстэрэ салгыы ыттар соц.ситимнэрин тэрийэр баҕа санаатын ыһыктыбат. Кини санаатыгар ыттар бэйэ-бэйэлэригэр субуоннаһан, хорунан үрэн аралдьыйар буолуохтара үһү. Дьэ, иэдээн, сайдыы дуу, акаарылар дойдулара дуу, диэх курдук.
