Өрөспүүбүлүкэтээҕи успуорт Министиэристибэтин пресс-сулууспата иһитиннэрэринэн, эти-хааны чэбдигирдэр дьарык иһин нолуок харчытын төннөрүүгэ, ханнык тэрилтэлэр хапсалларын Арассыйа успуордун Министиэристибэтэ бигэргэттэ.
Уопсайа барыта дойду үрдүнэн 3836 успуорт тэрилтэтэ испииһэккэ киирдэ, мантан 41 уораҕай Саха сиригэр баар.
Нолуок харчытын 2022 сылтан төннөрүөххэ сөп. Бу төлөбүрү ылыыга тэрилтэ сүрүн дьарыгынан успуорт уонна физическай култуура буолуохтаах, ыстаатыгар анал үөрэхтээх дьон үлэлиэхтээхтэр, тэрилтэ олох-дьаһах, өҥө биэрии эйгэтигэр устуорайата эҥкилэ суох буолуохтаах.
Төлөбүр муҥутуур чыпчаала120 тыһ. солк. тиийэ олохтонно. Гражданин успуордунан дьарык иһин төлөөбүт сумматыттан 13 % -нын төннөрөр кыахтанар.
