Ил Дархан Айсен Николаев дойду бырабыыталыстыбатын иһинэн Муора кэллиэгийэтин састаабыгар киирдэ. Маныаха туһааннаах дьаһалга премьер-миниистир Дмитрий Медведев илии баттаабыт. Бу туһунан Ил Дархан уонна бырабыыталыстыба пресс-сулууспата иһитиннэрэр.
Кэллиэгийэ саҥа састаабыгар 12 саҥа кытааччы киирбит, ол иһигэр, Айсен Николаевтан ураты, Санкт Петербург күбүрүнээтэрэ Александр Беглов, “Росгеология” генеральнай дириэктэрэ Сергей Горьков, Байыаннай муора флотун главнокомандующайа Николай Евменов, энергетика миниистирин солбуйааччы Павел Сорокин уонна да атыттар киирбиттэр.
Докумуоҥҥа маны таһынан кэллиэгийэ биэс чилиэнин дуоһунастара бигэргэммит. Урукку састааптан 11 киһини таһаарбыттар, ол иһигэр хас да эрэгийиэн баһылыгын.
