Войти

Войти

Ийэ хапытаалын усчуотугар дьиэ-уот туттуон баҕалаах дьон-сэргэ, аны Биэнсийэ пуондатыгар тутуу хайдах баран иһэрин туһунан сибиэдэнньийэ биэрэр эбээһинэстэн босхолоннулар. Ол курдук холобура урут: дьиэ акылаатын түһэрии, көҥдөйүн таһаарыы, өһүөтүн саайыы барыта докумуон отчуотун быһыытынан хайаан да ирдэнэр эбит буоллаҕына, билигин ийэ хапытаалын туттуу быдан судургутуйда. Ол олоххо киирэригэр бырабыытылыстыба саҥа уурааҕа олук буолуоҕа. Уураах сокуоннай күүһүгэр – 2021 сыл, кулун тутар 17 күнүттэн киириэҕэ, диэн иһитиннэрэр «Парламентскай хаһыат». Билигин аҥаардас биир докумуон баара сөп оҥорор – Росреестртан учаастак дьиэ кэргэн бас билиитигэр сылдьар диэн выписка – бу курдук бэлиэтээн суруйаллар кабмин саайтыгар.

Санатар эбит буоллахха, былырыыҥҥы сыл муус устар ыйыттан ийэ хапытаала Арассыыйа олохтоохторугар тутатына - оҕо төрөөтүн кытары ааҕыллар буолбута. Бастакы оҕо төрөөтөҕүнэ төрөппүттэр 483 882 солкуобай ылыахтарын сөп, оттон өскөтүн дьиэ кэргэҥҥэ иккис уонна онтон салгыы оҕолорго – 639 432 – лии солкуобай харчы аны көрүллэр буолбута.

Олорор дьиэ-уот усулуобуйатын тупсарыы таһынан, ийэ хапытаалын билигин аны инбэлиит-оҕолорго мал-сал, үөрэхтэрин төлүүргэ толору туһаныахха сөп. Кыра хамнастаах ыаллар ахсааннарыгар киирэр дьон аны ийэ хапытаалыттан бигэргэтиллибит биир суумманан ый ахсын ыла туруохтарын сөп, оҕо үс сааһын туолуор диэри. Ону таһынан, соҕотох ийэлэр, аҕалар ийэ хапытаалын бэйэлэригэр мунньуллар биэнсийэлэригэр ыытар бырааптаннылар.

Тарҕат:

Добавить комментарий