Биллэн турар, баччааҥҥа диэри Канада “спецназтара” хорсун быһыыларын, ураты сатабылларын, тугу да, кими да кыайбыт сурахтарын истибэт этибит эрээри, бу күннэргэ Канада Оборуонатын министиэристибэтэ Украинаҕа бэйэтин “спецназтарын” ыыппыт сураҕа кэллэ.
Канадалар бэйэлэрэ этэллэринэн, кинилэр “Украина уонна Арассыыйа икки ардыгар байыаннай иирсээн көбөн кэлэр түгэнигэр, Канада дипломаттарын Украинаттан көһөрүүгэ үлэлэһиэхтээхтэр”. Сорох ырытааччылар ону “НАТО састаабыгар киирэр Канада байыаннай чаастара Украинаҕа киирэн, Арассыыйа күүһүнэн өттөйөр дьулуурун ханыннарар соруктаахтар” диэн быһаараллар. Дьиҥинэн, Канада байыаннайдара Украинаҕа өссө 2015 сылтан киирэн инструктор быһыытынан үлэлээбиттэр эбит.
Канада уонна Украина “уруурҕаһалларыттан” киһи соһуйара суох. I уонна II Аан дойду сэриилэрин кэмигэр Арҕаа Украинаттан Канадаҕа күрээбит дьон уонна кинилэр сыдьааннарын ахсаана билигин 1,4 мөл. тиийэр. 38 мөл. нэһилиэнньэлээх Канадаҕа украиналар билигин да си-дьүгээр олорботтор, балай эмэ ыйааһыннаахтар.
