Аҕыйах хонуктааҕыта хайа эрэ сиргэ вахтовиктар тыатааҕыны, аһылыгынан мэҥиэлээн, дэлби тэптэрэн өлөрбүт видеолара социальнай ситимнэринэн киэҥник тарҕанна.
Онуоха Судаарыстыбаннай Дуума «Биир ньыгыл Арассыыйа» баартыйатын дьокутаата Владимир Бурматов, идэтинэн ханныгын-тугун быһаарса барбакка, тута Саха сирин олохтоохторун буруйдаата уонна кытаанах эппиэккэ тардыах буолан саанна.
Кини итинник ис хоһоонноох суруйуутун кэтэһэн олорбут сурутааччылара Саха сирин олохтоохторун, чуолаан сахалары, быдьар тылларынан тото-хана үөхтүлэр, омугунан сирэйдээн өһүөннээх, кырыыстаах тылларын туһаайдылар, бэл диэтэр, Саха сирин бүтүннүү дэлби тэптэрэн, сири кытта тэҥнииргэ ыҥырдылар.
Санатан этэр буоллахха, дьокутаат Бурматов былырыын, ыттары көмүскэспитэ буолан, Саха сирин олохтоохторун, сахалары, сидьиҥ тылларынан үөхтэрбитэ. Оччолортон кини суруйууларын анныгар сахалары быдьардык үөҕээччилэр, кырааччылар, саанааччылар халыҥ аармыйаларын тоҕо эрэ ким да уодьуганнаабат, эппиэккэ тардыбат.
Эһэни дэлби тэптэриилээх видео хаһан ханна уһуллубута биллибэт. Видеоҕа баар көстүү Саха сирин тыатыгар майгыннаабат, эһэни дэлби тэптэрбит дьон нууччалыы кэпсэтэллэр. Иккис курдук, Саха сиригэр вахтанан үлэҕэ үксүгэр атын сиртэн кэлэн үлэлииллэр уонна дэлби тэптэрэр сэби бырамыысалыннас дьоно тутталлар. Үһүс курдук, тыатааҕы сахаларга улаханнык ытыктанар кыыл, онон биир даҕаны саха эт өйүнэн сылдьан итинник быһыыламмат.
Айдаан тахсаатын кытта, Арассыыйа Ис дьыалаҕа министиэристибэтин Саха сиринээҕи межмуниципальнай управлениетын силиэстийэлиир салаата «Кыылга хабыр сыһыан» ыстатыйанан холуобунай дьыала тэрийдэ. Полиция үлэһиттэрэ, бастатан туран, быһылаан ханна буолбутун быһаарыахтаахтар. Ол кыалла илик. Видео атын сиргэ уһуллубута быһаарылыннаҕына, Саха сирин полицията Бурматовка бэйэтигэр, сымыйа иһитиннэриини тарҕаппытын иһин холуобунай дьыала тэрийэрэ дуу, тэрийбэтэ дуу биллибэт.
Сыл ахсын Саха сирин утары айдааны, омугунан сирэйдээн үөхсүүнү тардар дьокутаат Бурматовка «Омугунан атааннаһыыны күөртээһин» диэн ыстатыйанан холуобунай дьыала тэриллэрэ уолдьаста диэн суруналыыс Виталий Обедин, блогер Игорь Назаров санааларын эттилэр. Сорохтор дойду бэрэсидьиэнэ Владимир Путин аатыгар элбэх дьон илии баттааһыннаах суругу бэлэмниир туһунан кэпсэтэллэр. Оттон Саха сирин аатын көмүскүүр соруктаах «Үс» түмсүү манна тугу да хоруйдуу илик.
Аны туран Бурматов «Саха сирин олохтоохторо эһэни быыһыыллар» диэн эмиэ адьас атын сиргэ уһуллубут видеоны тарҕаппыт сурахтаах. Ити курдук кини оонньуута салҕанан барар турар, ол онтон кини сурутааччыларын саха дьонугар сыһыаннара тупсан кэлбэтэ, уларыйбата чахчы. Омугунан сирэйдээн үөхсээччилэри суут-сокуон эрэ көннөрөр кыахтаах. Ол эрээри, ону ирдэһээччи ким буолуохтааҕый: Саха сирин үрдүкү салалтата, ИДьМ Саха сиринээҕи управлениета,Саха сирин борокуратуурата, уопсастыбаннаһа? Ама бэйэбит испитигэр эрэ мөҕүттэн бараммыт, эмиэ умнуохпут дуо?
Иһитиннэриини бэлэмнээтэ Күндэли
Сэҥээриилэр