ХИФУ Хайа институтун алтыс кууруһун устудьуона Максим Егоров “Анаабыр алмаастара” хампаанньаҕа быраактыкаламмыт уонна үөрэҕин бүтэрдэҕинэ, АЛРОСА бөлөҕүн бу тэрилтэтигэр үлэҕэ киирэргэ суоттанар.
«Билигин ГСМ тэриллэрин өрөмүөннүүр уонна хааччыйар силиэсэринэн үлэлии сылдьабын. Сүрүннээн, ёмкостарга үлэлиибин. Баахта ньыматынан үлэлииргэ үөрэнним. Үөрэҕим кэнниттэн мэхээнньигинэн киирэр былааннаахпын. Хампаанньаҕа үлэлиир усулуобуйа толору оҥоһуллубут, хамнаһа быраактыкаланааччыларга да үчүгэй. Идэлээх быһыытынан сайдар, үүнэр да кыах баар диэн көрөбүн”, – диэн, эдэр киһи санаатын үллэстэр.
“Анаабыр алмаастара” АУо-ҕа “Олоххо путевка 2.0” диэн, оҥорон таһаарыыттан тэйбэккэ эрэ баахта ньыматынан үлэлии сылдьан үөрэнэр кыаҕы биэрэр бэртээхэй бырайыак баар. өрөспүүбүлүкэ үрдүк үөрэҕин кыһаларыгар эбии идэҕэ үөрэтии (переподготовка) бырагырааматыгар хампаанньа күн бүгүн 22 үлэһитэ “Хайа инженерэ”, “Хайа мэхээнньигэ”, “Энэргиэтик”, “Байытааччы” уонна “Суол үлэтин маастара” диэн идэлэргэ үөрэнэ сылдьар.
«Хампаанньа инженер, тиэхиньик үлэһиттэрин ортотугар ХИФУ-ну бүтэрэн баран үлэлии сылдьааччы лаппа элбэх. Оҕолору быраактыкаҕа элбэхтик ылабыт, оҥорон таһаарыыны кытта олохторун ситимниир баҕалаахтары түмэн, идэбит маастарыстыбатыгар, сатабылыгар кыһанан уһуйабыт. “Анаабыр алмаастарыгар” Хайа институтуттан уонна геологоразведочнай факультеттан биир сезоҥҥа, ортотунан, 20–30 устудьуон быраактыкаланар. Хас сыл аайы уонтан тахсалыы эдэр исписэлиис үлэҕэ киирэр”, – диир “Анаабыр алмаастара” АУо кылаабынай инженерэ Виктор Шамаев.
Дьэ, ити курдук, ким чахчы бырамыысыланнаска үлэлээн, сөптөөх хамнаһы, дохуоту аахсан, олоҕун уйгутун оҥостуон, сайдыан баҕарар, ол ыра санаатын холкутук олоххо киллэрэр кыахтаах. Онно “Олохтоох каадыры – бырамыысыланнаска” бырайыак туһата, көдьүүһэ улахан. АЛРОСА уонна өрөспүүбүлүкэ салалтата уонна олохтоох нэһилиэнньэ бу хайысхаҕа санаалара, интэриэстэрэ биир – дьон үлэлээх, дохуоттаах буолан, олох таһыма үрдээн, тупсан иһиэхтээх.
“Анаабыр алмаастара” хампаанньа пресс-сулууспата.
