Оҕо болҕомтотун ааҕыыга хатыыр, сэргэх, кэрэхсэбиллээх ханнык ньыманы толкуйдуохха, тобулуохха сөбүй диэн санаа тыл туһугар долгуйар, ыалдьар үгүс дьону үүйэ-хаайа тутар буолуохтаах.
Алтынньы 13 күнүгэр В.Г. Белинскэй аатынан Кыраайы үөрэтэр бибэлэтиэкэҕэ бэрт сонун, сэргэх тэрээһин буолан ааста.
Учуутал уонна уһуйааччы сылыгар анаан “Кыра Тыгын” (“Маленький принц”) айымньыны Жатайдааҕы “Василек” оҕо уһуйаанын иитээччилэрэ Валентина Николаевна Заболоцкая, Наталья Николаевна Корнилова, Ксения Олеговна Селиванова оҕолорго сонун ньыманан LEGO оонньуу нөҥүө туруоран көрдөрдүлэр. Оҕо мэйиитин үлэтэ, айар, толкуйдуур, ырытар дьоҕура ааҕыыны кытта ыкса ситимнээх. Онон бу тэрээһиҥҥэ оҕо оонньуур дьоҕурун кытта литэрэтиирэ уобарастааһына ситимнэспитэ олус кэрэхсэбиллээх буолла.
Антуан де Сент-Экзюпери “Маленький принц” айымньыта суруллубута номнуо 80 сыл ааста. Кини аан дойдуга биллэр суруйааччы, гражданскай авиация сайдыытыгар улахан сыратын иһин ”Почетный легион” уордьанынан наҕараадаламмыт лүөччүк. “Маленький принц” остуоруйа аан дойдуга олус уустук кэмҥэ, 1943 сыллаахха, күн сирин көрбүтэ. Бу айымньы сэрии кэмигэр дьон дууһутыгар умнуллубут кэрэни, тапталы тилиннэрбитэ, эрэли бэлэхтээбитэ. “Кыра Тыгын” 302-тэн тахса аан дойду уонна Арассыыйа норуоттарын тылыгар тылбаастаммыта.
Оттон 2019 сылтан аатырбыт остуоруйаны сахалыы ааҕар буолбуппут. СӨ үтүөлээх артыыһа, РФ суруйааччыларын сойууһун чилиэнэ, П.А. Ойуунускай аатынан судаарыстыбаннай бириэмийэ лауреата, суруйааччы Елена Васильевна Слепцова-Куорсуннаах “Маленький принц” айымньыны нууччалыыттан сахалыы тылбаастаабыта “Кыра Тыгын” диэн кинигэ буолан тахсыбыта.
“Василек” оҕо уһуйааныгар икки нэдиэлэ устата “Кыра Тыгынынан иэйиилэммиттэр” диэн тэрээһин ыытыллыбыт. Е.В. Слепцова-Куорсуннаах тэрээһин кыайыылаахтарыгар добун суруктары уонна анал бириистэри туттарда.
Кырачаан истээччилэргэ бибэлэтиэкэ үлэһиттэрэ “Кыра Тыгын” кинигэ ойуутунан сууламмыт минньигэс сакалааттары бэлэхтээтилэр, оҕолору үөртүлэр. Дьокуускай куораттааҕы «Бибилэтиэкэ тиһигин киинин» салайааччыта Нюргуяна Петровна Решетникова тэрээһин кыттыылаахтарын эҕэрдэлээтэ. «Сахалыы уус-уран айымньы үүнэ-сайда турарыгар сүҥкэн суолтаны уураҕыт, улахан кылааты киллэрэҕит» диэн истиҥ махтал тылларын эттэ.
Ааҕыыга таптал кыыма дьиэ кэргэҥҥэ саҕыллан, ааҕар-толкуйдуур мындыр үлэ оҕо кыра сааһыттан саҕаланнаҕына эрэ литэрэтиирэбит ааҕааччылаах буолуоҕа. Кинигэни ааҕыы суруйааччыны кытта сэһэргэһии тэҥэ. Онон кырачаан ааҕааччылары үүннэрэр-сайыннарар маннык сонун бырайыактар элбииллэрэ олус хайҕаллаах.
Саргылана Колесова, Дьокуускайдааҕы В.Г. Белинскай аатынан Кыраайы үөрэтэр бибэлэтиэкэ сүрүн бибилэтиэкэрэ.
