Бу күннэргэ “Саханефтегазсбыт” АУо бэрэстэбиитэллэрэ Үөһээ Халыма Зырянкатыгар уонна Эдьигээн эбэҥки национальнай уокуругун Эдьигээн сэл. сырыттылар, үрдүк кылаас үөрэнээччилэригэр уонна кинилэр төрөппүттэригэр идэни талыыга көмөлөһөр көрсүһүүлэри тэрийдилэр.
Эдьигээн сэлиэнньэтигэр “Саханефтегазсбыт” АУо каадыры сүүмэрдээһиҥҥэ, сыаналыырга уонна сайыннарыыга исписэлииһэ Юлия Александрова уонна “Эдьигээннээҕи ньиэп базата” филиал дириэктэрэ Николай Филиппов 8–11 кылаас үөрэнээччилэригэр, кинилэр төрөппүттэригэр хампаанньа үлэтин-хамнаһын, социальнай бэлиитикэтин туһунан кэпсээтилэр, ньиэп-гаас эйгэтигэр билигин тоҕоостоох идэлэри, тус сыаллаах бырагыраама көрүҥнэрин сырдаттылар. Ол курдук, “Саханефтегазсбыт” АУо бэрэстэбиитэллэрэ хампаанньа выпусниктары Дьокуускай, Тюмень, Уфа, Хабаровскай уонна Москуба куораттар үрдүк үөрэхтэрин кыһаларыгар тус сыаллаах бырагырааманан үөрэттэрэ ыытар дуогабарга илии баттыырга бэлэмин иһитиннэрдилэр.
Маны таһынан, оскуола выпускниктарыгар Эдьигээннээҕи ньиэп базатыгар экскурсияны тэрийдилэр. Үөрэнээччилэр филиал кэллэктиибэ түмсүүлээхтик үлэлиирин, үлэ араас түһүмэҕэр хас биирдии хамсаныы ситэрсэн биэрэрин, хардары дьайсыылааҕын көрдүлэр, миэстэтигэр исписэлиистэргэ сэҥээрэр ыйытыыларын биэрэн сиһилии хоруйу иһиттилэр. Эбэн эттэххэ, хампаанньа үлэлэтэр профориентационнай бырагырааматын чэрчитинэн үрдүк кылаас үөрэнээччилэрэ “Саханефтегазсбыт” тэрилтэ 19 филиалыгар барытыгар сылга иккитэ экскурсиялыыллар.
Зырянка бөһүөлэгэр бэрэстэбиитэллэр эмиэ үөрэнээччилэри, төрөппүттэри кытта көрүстүлэр. Оҕолор ньиэп-гаас салаатыгар тоҕоостоох идэлэри улаханнык сэҥээрэллэрин көрдөрдүлэр, үлэһит буолан өрөспүүбүлүкэ биир бөдөҥ стратегическай хампаанньатын хамаандатыгар үлэлии киириэхтэрин баҕаралларын биллэрдилэр.
“Саханефтегазсбыт” АУо генеральнай дириэктэрэ, норуот дьокутаата Виктор Лебедев оҕолор үөрэхтэрин бүтэрэн хампаанньаҕа үлэлии киирэллэрин мэктиэлээн, өрөспүүбүлүкэ бастыҥ выпускниктарын дойду сүрүн үрдүк үөрэҕин кыһаларыгар үөрэттэрэ ыытарга бэлэмнэрин бэлиэтээтэ:
– Биһиги маннык кыаҕы Дьокуускай куорат үрдүк кылааһын үөрэнээччилэригэр эрэ буолбакка, арктическай улуус үөрэнээччилэригэр эмиэ биэрэр баҕалаахпыт. Сотору кэминэн исписэлиистэрбит Томпо Хаандыгатыгар уонна Таатта Ытык Күөлүгэр айанныахтара, – диэн Виктор Николаевич эттэ.
Сүүмэрдээһин ыытыллыбытын, дуогабарга илии баттаммытын кэннэ, выпускниктар ньиэп-гаас дьыалата, ньиэби харайыы, ньиэп тырааныспарын эбийиэктэрин үлэлэтии, көрүү-истии уо.д.а. хайысхаларга үөрэнэн идэ ылар кыахтаныахтара. Тус сыаллаах бырыгарааманан үөрэниэн баҕалаах хас биирдии выпускник сайаапкатын ыытыан сөп. Тургутук, оскуола аттестатын уонна СКЭ баалын түмүктэринэн сүүмэрдээһини оҥоруохтара.
Былаан быһыытынан, 2024 сыл күһүнүттэн тэрилтэ профориентационнай бырагыраамата үс түһүмэхтээх буолуоҕа. Манна профориентационнай үлэҕэ сүрүн кииннэринэн: оскуола үөрэнээччилэригэр – А.Е. Мординов аатынан Таатта лиссиэйэ (Ытык Күөл сэл.), орто анал үөрэх устудьуоннарыгар – хайа-геология техникума (Томпо улууһун Хаандыга бөһ.), үрдүк үөрэх устудьуоннарыгар – “Саханефтегазсбыт” АУо тэрийбит “Ньиэп бородуукталарын оҥорон таһаарыы уонна харайыы” үөрэх аудиторията (М.К. Аммосов аатынан ХИФУ тэхиниичэскэй куорпуһугар баар).
– Кэлиҥҥи сылларга өрөспүүбүлүкэбитигэр эрэ буолбакка, дойду үрдүнэн бары салааларга үрдүк квалификациялаах инженер каадырдары таһынан орто үөрэхтээх исписэлиистэр тиийбэттэрэ сытыы кыһалҕа буолла. Ол иһин кэнэҕэһин тэрилтэбитин эдэр каадырынан тиһиктээхтик хааччыйар туһугар элбэх түһүмэхтээх профориентационнай бырагырааманы үлэлэттибит, – диэн хампаанньа генеральнай дириэктэрэ Виктор Николаевич бэлиэтээн эттэ.
