Балаҕан ыйын 17 күнүгэр өрөспүүбүлүкэ үрдүнэн «Нация кроһа – 2022» күргүөмүнэн сүүрүү ыытылынна. Аҥаардас Дьокуускайга барыта 8 тыһыынча кэриҥэ киһи сүүрдэ. Күрэхтэһии сүрүн судьуйатынан үрдүк өрөспүүбүлүкэ таһымнаах судьуйа Альберт Трофимов буолла. Кыттааччылар Сэргэлээх шоссетыттан куорат туһаайыытынан сүүрэн Сайсары муостатынан «Юность» стадиоҥҥа кэллилэр.
Сүүрүүнү күүстээх легкоатлеттар саҕалаабыттар. Кинилэр кэннилэриттэн Дьокуускай оскуолаларыгар үөрэнэр 2005-2007 с.т. оҕолор тахсыбыттар. Онтон – тэрилтэ салайааччылара уонна доруобайаларынан хааччахтаах дьон. Бүтэһигинэн 2004 сылга диэри төрүөх эр дьон уонна дьахтар аймах сүүрбүттэр.
Бу тэрээһиҥҥэ ордук эдэр да, эмэн да дьон кэлэн кытталлара кэрэхсэтэр. Холобура, 73 саастаах Владимир Семенович Сивцев 16 саастаах сиэнэ Анжелика Сивцевалыын кыттыбыт. Биир интэриэстээх эһэлээх сиэн, төһө да атын-атын бөлөхтөргө сүүрдэллэр, бу күн көрсөн биир суолунан сүүрэн, хайдах сүүрбүттэрин кэпсэтэн, ситиһиилэрин үллэстэн, улаханнык үөрбүттэр-көппүттэр. Сүүрүүнү таһынан, кинилэр өссө үҥкүүнэн дьарыктаналлар. Быһата, барытыгар дьаныардаахтар. Онон, кинилэр холобурдарыгар успуорт көлүөнэлэри ситимниир үтүө өрүтэ чаҕылхайдык көстөр.
