Саха сиригэр аан бастакытын ыытыллар Арассыыйа саахымакка кубогын эр дьону сүүмэрдиир түһүмэҕэ - Ил Дархан саахымакка кубога бүгүн Дьокуускай куоракка Национальнай ойуулуур-дьүһүннүүр түмэлгэ өрө көтөҕүллүүлээхтик саҕаланна. Манна Арассыыйа араас муннуктарыттан аан дойду таһымнаах гроссмейстердар, эдэр-эмэн саахыматчыттар кытталлар.
Кубок аһыллыытыгар Саахымат өрөспүүбүлүкэтээҕи бэдэрээссийэтин бэрэсидьиэнэ, Үүнэр көлүөнэ тус сыаллаах пуондатын генеральнай дириэктэрэ Владимир Егоров аан дойду саахымакка хас да төгүллээх чөмпүйүөнэ, РФ Госдуматын дьокутаата Анатолий Карпов эҕэрдэтин ааҕан иһитиннэрдэ. Анатолий Евгеньевич Саха сиригэр элбэхтик кэлэ сылдьыбытын уонна манна саахыматы олус сөбүлүүллэрин, онон бу тэрээһин улахан кэскиллээҕин бэлиэтээбит.
Тэрээһини үөрүүлээхтик аһыы кэннэ Кубок сүрүн судьуйата, аан дойду таһымнаах арбитр Михаил Крюков турнир хайдах быһыылаахтык барарын быһаарда. СМИ үлэһиттэригэр сырдатыыга 10 эрэ мүнүүтэ биэрдилэр, турнирга мобильнай төлөпүөннээх олорор сатамматын туһунан санаттылар.
Биһиги харахпыт эдэр кыттааччыларга, оҕолорго хатанна. Сорох оҕолор улахан дьону кытта оонньоору долгуйа олороллор. Холобура, мөлтөхтүк истэр дьон ортотугар Арассыыйа чөмпүйэнээтигэр кыайбыт успуорт маастарыгар хандьыдаат Владимир Шалагин 2-c разрядтаах 12 саастаах Слепцова Валерияны кытта оонньоору олорор.
Олус чобуо саҥалаах, сытыы көрүҥнээх 9 cаастаах Артем Солдатов Бурятияттан кэлбит. Кинини аҕата арыаллаан аҕалбыт. Уолчаан биэс сааһыгар эһэтэ саахыматтыырын көрөн сэргээбит. Онтон ыла утумнаахтык дьарыктанар. Бу Арассыыйа таһымнаах иккис улахан күрэхтэһиитэ. Инники Сочи куоракка тиийэн күрэхтэспит. Улахан киһини кытта оонньуохтаахпын диэн билэн олорор.
16 саастаах Артем Хуснулгатин Сахалинтан сылдьар. Бу кини Саха сиригэр иккис кэлиитэ. Саахымакка эһэтэ үөрэппит. Эмиэ биэс сааһыттан дьарыктанар эбит. Өссө да кэпсэтиэх уол бириэмэтэ бүтэн миэстэтигэр барда.
“Алроса” хампаанньа өйөбүлүнэн ыытыллар үрдүк таһымнаах тэрээһин Саха сиригэр саахыматы саҥа таһымҥа таһаарарга, саахыматчыттары көҕүлүүргэ, сайыннарарга туһуланар. Ол да иһин, Кубок чэрчитинэн, сүрүн күрэхтэһиилэри таһынан, судьуйалары үөрэтэр сэминээрдэр, гроссмейстердар маастар-кылаастара, оонньуур сеанстара уонна баҕалаах дьоҥҥо кылгас (блиц) турнирдар ыытыллыахтара.
Кылгас турнирдарга кыттыан баҕалаахтары Өрөспүүбүлүкэтээҕи саахымат-дуобат киинигэр тохсунньу 28 күнүгэр 15:00 чааска суруйтарыыга уонна тохсунньу 29 күнүгэр сарсыарда 10:00 чаастан турнирдарга ыҥыраллар.
Кубок олунньу 1 күнүгэр 18:00 диэри буолуоҕа. Партиялары тэрээһин http://cup.sakhachess.ru/broadcast саайтыгар онлайн көрдөрөллөр.
Тэрээһини сырдатта Күндэли.
